НВК САХА – Мэҥэ Хаҥаласка Хара нэһилиэгин таас оскуолатын тутуута 46% бүтэн, бу дьыл ахсынньы ыйыгар үлэҕэ киириэхтээх. Бу туһунан СӨ Тутуу министиэристибэтэ иһитиннэрэр.


220 миэстэлээх саҥа уопсай үөрэх тэрилтэтэ «Үөрэхтээһин сайдыыта» федеральнай сыалламмыт бырагыраама чэрчитинэн тутулла турар. Билиҥҥи туругунан, Петровка сэлиэнньэ олохтоох 105 оскуола саастаах оҕото Майаҕа үөрэнэргэ күһэллэр.

«Оскуола саҥа дьиэтэ биһиги ытыктыыр биир дойдулаахпыт, биллиилээх уопсастыбаннай деятель, оскуолаҕа аата иҥэриллибит Иннокентий Игнатьев 90 сааһын туолуутугар түбэһиннэрэн үлэҕэ киириэхтээх. Хара нэһилиэгин олохтоохторун аатыттан, өрөспүүбүлүкэ салалтатыгар уонна биһиги оскуолабыт судаарыстыбаннай бырагыраамаҕа киирэригэр күүс-көмө буолбут, оскуола тутуутугар улахан сыраларын уурбут дьоҥҥо-сэргэҕэ махталбытын тириэрдэбин», – диир «Хара нэһилиэгэ» МТ баһылыга Дарья Назарова.

Хара оскуолата – Мэҥэ-Хаҥалас улууһун киэн туттуута. Бу оскуолаттан аатырбыт аан дойду таһымнаах спортсменнар: көҥүл тустууга Алексей, Петр Копыловтар уонна боксер Василий Егоров үүнэн тахсыбыттара.

Источник: http://nvk-online.ru

0
0
comments powered by HyperComments