Майатааҕы «Кыталык» кииҥҥэ «Доҕорум ‒ Поэзия, сэргэ хаамсан иһэрбит саныахха үчүгэйин» тэрээһин буолан ааста. Константин Сосин 75 сааһыгар ананна.
Мэҥэ Хаҥалас улууһун поэта Константин Сосины үбүлүөйүнэн Дьокуускайтан Саха сирин Суруйааччыларын сойууһун бырабылыанньатыттан Николай Винокуров‒Урсун, «Чолбон» сурунаалтан суруйааччы Иван Осипов‒Ойуур, драматург Семен Ермолаев‒Сиэн Өкөр, «Кэскил» хаһыат, «Чуораанчык» («Колокольчик») сурунаал эрэдээктэрэ Татьяна Жиркова, «Кыым» хаһыаттан Афанасий Гуринов‒Арчылан, оройуон салалтатыттан Николай Цыпандин, улуус култуураҕа уонна духуобунай сайдыыга управлениетын начаалынньыга Дмитрий Аргунов, улуустааҕы үөрэх управлениетын начаалынньыгын солбуйааччы Вера Тимофеева, «Таммахтар» литературнай холбоһук салайааччыта Августина Владимирова, биир дойдулаахтарыттан Аполлон Апросимов, үөрэнээччилэрэ, бииргэ төрөөбүт быраата Илья Сосин уо.д.а. эҕэрдэлээтилэр. Константин Ильичкэ «СӨ үөрэҕириитин Бочуоттаах бэтэрээнэ», «Оройуоҥҥа бэчээт сайдыытыгар кылаатын иһин» бэлиэлэр үөрүүлээх быһыыга-майгыга туттарылыннылар.
Николай Егорович Константин Ильиһи үөлээннээҕин быһыытынан сырдатта. Университекка биир кэмҥэ үөрэммиттэр. Кини чахчы оҕолорго суруйар бэйиэт буоларын, ол гынан баран кэнники кэмнэргэ улахан дьоҥҥо аналлаах хоһооннордооҕун бэлиэтээтэ итиэннэ бэйэтин саҥа кинигэтин бэлэхтээтэ.
Бу күн оскуолалартан, оҕо уһуйааннарыттан кырачааннар түмсэннэр суруйааччы хоһооннорун аахтылар, ырыаларын-үҥкүүлэрин бэлэхтээтилэр.
Константин Сосин — Россия Суруйааччыларын сойууһун чилиэнэ, оҕо литературатыгар Амма Аччыгыйа аатынан судаарыстыбаннай бириэмийэ лауреата, Мэҥэ Хаҥалас оройуонун, Моорук, Тыыллыма нэһилиэктэрин Бочуоттаах гражданина
Ааптар: Марфа ПТИЦЫНА, «Эркээйи» хаһыат, Мэҥэ-Хаҥалас улууһа
