Мэҥэ Хаҥалас улууһугар инбэлиит дьон ахсаана икки тыһыынчаттан тахса, итиэннэ икки сүүстэн тахса оҕо араас группалаах инбэлииккэ учуокка турар. Оройуоннааҕы тустаах уопсастыба көҕүлээн, эдэрдэри, орто уонна аҕам саастаахтары араас хабааннаах тэрээһиннэргэ кытыннарар.
Уон күн устата Мэҥэ Хаҥалас улууһугар ыытыллар инбэлииттэр дэкээдэлэрэ ыспартакыйааданан сэтинньи 19 күнүгэр саҕаланна. Спорт бырааһынньыгын үөрүүлээх тэрээһинигэр улуус баһылыгын социальнай боппуруостарга солбуйааччы Николай Цыпандин, улуустааҕы физическэй култуура уонна успуорт управлениетын начаалынньыга Константин Захаров, улуустааҕы социальнай көмүскэллээх буолуу управлениетын начаалынньыгын солбуйааччыта Александр Игнатьев, улуустааҕы инбэлииттэр уопсастыбаларын бэрэссэдээтэлэ Тамара Пермякова кыттыыны ылан, кыттааччылары эҕэрдэлээтилэр.
Быйыл үбүлүөйүн бэлиэтиир уопсастыба чилиэттэрин эҕэрдэлээһин үтүө үгэскэ кубулуйан, бу да сырыыга бастыҥнар бэлиэтэннилэр. Майа ытык ыаллара Светлана, Николай Охлопковтар бииргэ олорбуттара 50 сылларынан чиэстэннилэр. Николай Охлопков олорон эрэ волейболга улуус сүүмэрдэммит хамаандатын көхтөөх оонньооччута, хамаанда бас-көс киһитэ.
Ыспартакыйаада уопсайа сэттэ көрүҥүнэн ыытылынна. Остуол оонньуулара хабылык, хаамыска, остуол тиэнниһэ, дуобат, саахымат уонна шау-даун (көрбөттөргө аналлаах остуол тиэнниһэ) маны таһынан, “Ийэм, аҕам уонна мин успуорт дьиэ кэргэн” күрэхтэһиитигэр Майаттан Егоровтар уонна Билюкиннар дьиэ кэргэттэрэ кыттыыны ылан, өрөспүүбүлүкэҕэ кыттар быраабы ыллылар.
Дэкээдэ чэрчитинэн СӨ ыччаты, дьиэ кэргэни өйүүр социальнай-психологическэй киин Мэҥэ Хаҥаластааҕы филиалын үлэһиттэрэ инбэлииттэргэ анаан психологическэй тренини уонна бэсиэдэни тэрийдилэр. Дэкээдэ чэрчитинэн уопсастыба чилиэттэрэ улуус бары тэрилтэлэрин салайааччылара кыттыылаах ыытыллар төгүрүк остуолга, И.М.Сосин аатынан улуустааҕы киин библиотекаҕа “Туох, ханна, хаһан?” викторинаҕа кыттыахтара. Маны сэргэ нэһилиэктэринэн дьаһаллар бараллар.
Дэкээдэ түмүктүүр тэрээһинэ Догдоҥоҕо ыытыллара былааннанар. Өрөспүүбүлүкэҕэ ыытыллар куонкурустарга, күрэхтэһиилэргэ улуус инбэлииттэрэ өрүү көхтөөктүк уонна ситиһиилээхтик кытталлар. Сэтинньи 26 күнүгэр ыытыллар өрөспүүбүлүкэтээҕи дьиэ кэргэн куонкуруһугар Нуораҕанаттан Валентина, Петр Свешниковтар кыттыахтара.
Улуустааҕы инбэлииттэр уопсастыбаларын төрдүс сылын Тамара Пермякова салайар. Тамара Николаевна дьону түмүүгэ, көҕүлээһиҥҥэ элбэх хайысхалаах, тулууру, дьулууру эрэйэр ыарахан үлэтигэр сүрдээх эппиэтинэстээхтик сыһыаннаһарын бэлиэтиир тоҕоостоох.
Ааптар: Зоя ГЕРАСИМОВА, Мэҥэ Хаҥалас улууһа
