Матвей Евсеев ананыытын туһунан АЛРОСА официальнай саайтыгар суруйдулар. Кини сиртэн хостонор баай объектарыгар анал бырайыактары олоххо киириини салайыаҕа.
«Матвей Евсеев үлэҕэ уопута, билиитэ бырайыактар сайдыыларыгар саҥа сүүрээни киллэриэҕэ, онон хампаанньа сайдыытыгар туһаны биэриэҕэ», — диэн АЛРОСА президенэ Андрей Жарков этэр.
Матвей Евсеев бу иннинэ «АЛРОСА» АХ иһинэн үлэлиир «Анаабыр Алмаастара» ААУо сүрүннүүр дириэктэринэн үлэлээбитэ.
Онтон «Анаабыр Алмаастарын» саҥа дириэктэрэ ким буолара «АЛРОСА» кэтээн көрөр Сэбиэтин кандидатуралары көрүүтүн кэнниттэн биллиэҕэ.
«Анаабыр Алмаастара» акционернай уопсастыба Анаабыр, Өлөөн, Булуҥ, Эдьигээн сирдэригэр алмааһы хостооһуҥҥа үлэлиир.
