Бэс ыйын 17 күнүгэр Мөҥүрүөн нэһилиэгин Матта бөһүөлэгэр тунал ыһыах ыһылынна.
edersaas.ru
Бахсы, Арыылаах, Матта холбоһуктаах ыһыахтара Саха сирин култууратын үтүөлээх артыыһа Яков Кычкин төрөөбүтэ 100 сылыгар ананна. Кэрэ айылҕалаах Күөйэ маанылаах алааһыгар ыытыллыбыт ыһыах күндү ыалдьыттарынан Яков Прокопьевич төрөппүт кыыһа Любовь Яковлевна кэргэнинээн Руслан Шипковтыын буоллулар.
Мөҥүрүөн нэһилиэгин баһылыга Иннокентий Андросов күндү ыалдьыттары самаан сайыны көрсөр ыһыаҕынан эҕэрдэлээтэ уонна нэһилиэктэр олохтоохторун инникитин даҕаны былааннаахтык, түмсүүлээхтик үлэлииргэ ыҥырда. Манна даҕатан эттэххэ, Арыылаах, Окоемовка уонна Мөҥүрүөн баһылыктара бииргэ үлэлииргэ 2012 с. илии баттаспыттара. Манна 2017 сылтан Чурапчы улууһун Бахсы сэлиэнньэтин баһылыга Иннокентий Барашков кыттыспыта.
Ыһыах кэмигэр үс нэһилиэк кыттыһан тэрийбит Боотурдар күрэхтэригэр дьон-сэргэ тоҕуоруһа муһунна. Кимиэллээх киирсии кэнниттэн Уус Алдан улууһун Окоемовкатыттан сылдьар Дьулус Сыроватскай убаһанан наҕараадаланна. Онтон Мэҥэ Хаҥалас улууһун Төҥүлүтүн олохтооҕо Константин Стручков ат сүүрдүүтүн лотереятыгар таба тайанан, массыына сүүйдэ.
Ити курдук, тыа сирин үлэһит дьоно ыһыаҕы үөрэ-көтө көрсөн, сайыҥҥы былдьаһыктаах кэмҥэ үлэҕэ-хамнаска турунарга бэлэмнэр.
Ньургуйаана СКРЯБИНА-САЙДЫЫНА, «Саха сирэ» хаһыат, edersaas.ru
