Билигин номнуо үлэ саҕаланна. Тутуу үбэ-харчыта 4,7 млрд солк. быһылынна. 2018 сылга тутуллан үлэҕэ киллэриллиэхтээх эрээри, үбүлээһин хаамыытыттан тутулуктаах.
Бүлүү суолун 756-с килэмиэтиригэр тутуллуохтаах муостаны (Марха өрүһү Ньурба улууһун Дьаархан нэһилиэгин аннынан туоруур) Россия биир биллэр-көстөр «Сибмост» ААУо тутуохтаах. Бу хантараак «сибмостарга» ирбэт тоҥноох Уһук Хоту дойду усулуобуйатыгар бастакы үлэлэрэ эрэ буолбатах. «Сибмостар» Норильскай өрүскэ туппут тимир уонна массыына суоллаах холбоһуктаах муосталара аан дойдуга хоту тутуллубут муосталартан саамай улаханнара буолар. Маны таһынан, Саха сиригэр Тамма, Улахан Кэтэмэ, Таатта үрэхтэри туоруур муосталары туппута.
Бүлүү суолугар муосталары өрөмүөннээһиҥҥэ бүтэһик сылларга күүстээх үлэ ыытылынна. Чыбыыда, Танара үрэхтэринэн муосталар үлэҕэ киирэннэр, Үөһээ Бүлүүгэ диэри сылы быһа эргиччи айан-сырыы олохтонно.
