Оҕо нефрологиятын сылын уонна Бүөр бүтүн аан дойдутааҕы күнүн чэрчитинэн кулун тутар 10-17 күннэригэр Дьокуускайга аһымал акциялар уонна дьаһаллар ыытыллаллар. Төрөппүттэр кулууптара, «Инникигэ эрэл» бырайыак туһунан көһө сылдьар быыстапка үлэлиир.
«Пульс надежды» аһымал акция чэрчитинэн кулун тутар 10 күнүгэр Медицина национальнай киинигэр бүөрдэрэ ыалдьар кырачааннарга оҕо нефрологтара босхо сүбэ-ама биэрдилэр. Педиатрия киинигэр «Мин кыайыыларым тэтэрээтэ» аһымал акция тэрилиннэ. Бүөрдэрэ көһөрүллүөхтээх, диализка сылдьар уонна нефроотделение кырачаан ыарыһахтарыгар маастар-кылаас ыытылынна. Нэһилиэнньэҕэ бүөр ыарыытын эрдэ быһаарарга босхо чинчийии оҥоһулунна.
Бүөр көһөрүүтүн эпэрээсийэтигэр киириэхтээх биэс саастаах уол оҕоҕо көмөлөһөргө аһымал кэнсиэрт кулун тутар 13 күнүгэр «Мандарин» культурнай кииҥҥэ ыытыллыаҕа.
«Нефролог-бырааска сылдьыы киһи бэйэтин доруобуйатыгар болҕомтотун уурар үтүө үгэстэриттэн биирдэстэринэн буолуохтаах. Кини сөпкө аһааһыҥҥа, спордунан дьарыктанарга болҕомтотун ууруохтаах. Бу акция, биллэн турар, хас биирдии киһи бэйэтин бүөрүгэр болҕомто уурарыгар көмөлөһөр соруктаах. Сылга саатар биирдэ боростуой анаалыстары туттаран бүөр туругун бэрэбиэркэлэтэр үгэс бу ыарыы ыарахан содулларыттан куотарга көмөлөһүөҕэ», – диэн «Инникигэ эрэл» социальнай бырайыак ааптара Наталия Каратаева бэлиэтиир.
Бырайыагы көҕүлээччилэр баҕалаах дьону акцияҕа кыттыһарга ыҥыраллар. Дьокуускайга доруобай үгэстэр нэдиэлэлэрэ «Нефро-Лига», СӨ Доруобуйа харыстабылын министиэристибэтин уонна Саха сирин чааһынай медицинскэй клиникаларын уонна кииннэрин холбоһугун өйөбүллэринэн ыытыллаллар.
