19 Кулун тутар 19.03
  • -10°
  • $ 91,98
  • 100,24

"Мамми и я" интернет күрэххэ Намтан Решетниковтар кыайдылар

19:13, 05 декабря 2018
Текст:
Читайте нас на
Яндекс Новости
ЯДВ

Ааспыт нэдиэлэҕэ инстаграмҥа «Мамми и я» диэн өрөспүүбүлүкэтээҕи дьиэ кэргэн куонкурса кэтэхтэн ыытыллыбыта. Күрэх аһаҕас страницаҕа куоластааһынынан чиэһинэйдик барда. Манна Нам улууһуттан Люция Семеновна уонна Дмитрий Львович Решетниковтар улахан дьиэ кэргэттэрэ гран-при хаһаайынын үрдүк аатын сүктүлэр.


Өрөспүүбүлүкэҕэ «Мамми и я»  22-с төгүлүн ыытыллар куонкурус быйыл Интернет көмөтүнэн кэтэхтэн ыытылынна. Быйыл 23 ыалтан 70 киһи кыттыбыт. Гран-при үрдүк аатын Намтан Решетниковтар дьиэ кэргэн ылла. Ыал ийэтэ Люция Семеновна кэпсииринэн, куонкурус туһунан эмискэ билэннэр, биир мүнүүтэ уһуннаах дьиэ кэргэн олоҕун-дьаһаҕын көрдөрөр видеокиинэни ыыппыттар. Ийэ кыыһынаан Радалыын үрүҥ көмүс сыбаайбаҕа ыллаабыт дьиэ кэргэни түмэр ис хоһоонноох  уонна «Ответственное родительство» диэн республикатааҕы куонкуруска дьиэ кэргэнинэн ыллаабыт ырыаларынан доҕуһуолаппыттар.

Дьүүллүүр сүбэ салайааччытынан Сахабыт сирин эстрадатын чаҕылхай ырыаһыта Сахаайа үлэлээбит. Куонкурус бастакы тэрийээччилэринэн Марфа уонна Василена Шариналар, онтон олохтооччуларынан Саха республикатын ыччакка уонна социальнай сыһыаннаһыыларга министерствота уонна Саха Өрөспүүбүлүкэтин дьахталларын тэрилтэлэрин сойууһа буолаллар.

Улахан ыал ийэтэ Люция Семеновна күрэхтэһии интернетинэн ыытыллан, кэлэ-бара айаммытыгар ороскуотурбатыбыт уонна саамай улахан бириискэ, гран-прига тиксибиппититтэн олус диэн үөрдүбүт, дьоллоннубут диэн санаатын үллэстэр. Наҕараадалааһын биир күн иннинэ киэһэ 11 чааска кыайыылаах таҕыстыгыт диэн биллэрбиттэригэр соһуйан эрэ хаалбыттар.

Бу тэрээһин дьиэ кэргэни түмэр, оҕо бэйэ бодотун тардынарыгар, бэйэтин күүһүгэр эрэнэригэр, сыанаҕа тутта-хапта, иҥнигэһэ-толлугаһа суох саҥара-иҥэрэ үөрэнэригэр, ийэ, аҕа оҕону иитэригэр көмөлөһөр сыаллаах-соруктаах.

«Маннык үрдүк ситиһиилэммиппитигэр оҕолорбун үөрэтэр музыкальнай оскуола преподавателлэрин өҥөлөрө улахан, бу — кинилэр үлэлэрин түмүгэ», — диир Люция Семеновна. Конкурска 13 саастаах Рада, 14 саастаах Саша — Нам 1-кы №-дээх орто оскуолатын 7-с «в» кылааһын үөрэнээччилэрэ, 10 саастаах Марина — Нам алын сүһүөх оскуолатын 4-с «г» кылааһын үөрэнээччитэ, Валера — Нам 1-кы №-дээх орто оскуолатын 5-с «г» кылааһын үөрэнээччитэ, студент уолаттара: 20 саастаах Софрон, 23 саастаах Дмитрий кыттыбыттар.

Куонкурус түмүгүнэн Решетниковтар кыайыылаах аатын ылан, дипломунан уонна туоһу суругунан наҕараадаламмыттар. Ыччат уонна социальнай сыһыаннаһыылар министерстволара иллээх, көхтөөх дьиэ кэргэҥҥэ оҕо спортивнай комплексын атыылаһарга сертификат бэлэхтээбит.

Бу дьиэ кэргэн туһунан билиһиннэрэр буоллахха, Люция Семеновна уонна Дмитрий Львович түөрт төрөппүт, аҕыс иитэр оҕолоохтор. Аҕыс оҕо — оскуола үөрэнээччилэрэ, икки оҕо — оҕо саадын иитиллээччилэрэ. Куонкуруска кыттыбыт алта оҕоттон түөрдэ — музыкальнай оскуола үөрэнээччилэрэ: икки оҕо хореографияҕа, үс оҕо — фортепианоҕа, 1 домраҕа; спорт өттүгэр икки оҕо — сүүрүүгэ, 1 оҕо — волейболга эттэрин-хааннарын сайыннараллар.

«Биһиги сүрүн-сыалбыт сорукпут диэн, олоххо бэлэмнээх, бэйэлэрин сатаан көрүнэр, дьиэлээх-уоттаах, ыал буолар баҕа санаалаах дьон гына иитэн таһаарыахтаахпыт. Улууспут атын да дьиэ кэргэттэрэ толлубакка маннык конкурстарга кытта сатаатыннар», — диир ыал ийэтэ.

Ааптар: Анастасия КОРЯКИНА

Следите за самым важным и интересным в Telegram-канале и WhatsApp-группе ЯСИА