Александр Федотов аатыгар боксаҕа «А» кылааска бүтүн Россиятааҕы күрэхтэһии өрөспүүбүлүкэҕэ саҥа маастардары бэлэхтээтэ уонна судьуйалар квалификацияларын үрдэттэ. Кэлэр сылтан турнир Россия чемпионатыгар сүүмэрдиир күрэхтэһиинэн буолуоҕа. Ааспыт турнир туһунан боксаҕа олимпийскай эрэллэр оскуолаларын дириэктэрэ Максим Куприянов СИА-ҕа кэпсээтэ.
«Дойду 24 регионуттан кытыннылар — бу турнир күүһүн көрдөрдө. Эдэрдэргэ Россия спордун маастарын аатын ылыыга нуорманы толорууга кыаҕы биэрэр соруктаах ыытыллыбыт буолан, ким бэйэтигэр эрэнэр күрэхтэһиигэ кытынна«, — диэтэ Максим Куприянов.
Ыалдьыт-спортсменнар күрэхтэһиини сөбүлээтилэр. Кинилэр олороллоругар, күрэхтэһэллэригэр усулуобуйаны тэрийээччилэр сөпкө хааччыйдылар. Онон эһиил эмиэ Саха сиригэр кэлэргэ бэлэмнэрин эттилэр.
Саха сирин боксердара үс кыһыл көмүс, үс үрүҥ көмүс уонна сэттэ боруонса мэтээли иилиннилэр. Олохтоох спортсменнартан Михаил Прокопьев, Борис Сидоров уонна Виталий Стручков кыайыталаатылар. Бористаах Виталий боксаҕа Россия спордун маастара нуорманы толордулар.
«Мин эдэр боксер Виталий Стручкову бэлиэтиэм этэ. Үс киирсиитин көрдүм. Атааканан, сиэрийэлээн охсуунан кыайарын, сыалыгар чопчу саайарга үөрүйэҕин сөбүлээтим. Рингаҕа олус сөптөөхтүк үлэлиир. Бэйэтин боксаҕа туттуутун утарылаһааччытыгар соҥнуур, бу олус суолталаах. Киирсиини салайан иһии — кыайыыга күлүүс, ханна эрэ тэтимирэн, ханан эрэ иккис нүөмэринэн үлэлээн. Кини киирсиилэрин сөбүлээтим, уол баара-суоҕа 19 эрэ саастаах, онон өссө да сайдарыгар эрэллээхпин», — диэтэ Максим Куприянов.
Салгыы 52 кг диэри киирсэр Борис Сидоров туһунан кэпсииригэр, боксер бэйэтин улахан таһымҥа биллэрэригэр кэмэ кэлбитин эттэ. «Сиппит-хоппут боксаны көрдөрдө. Финалга күүһүн эрэ буолбакка, өй-санаа өттүнэн эмиэ сиппитин-хоппутун биллэрдэ. Бу олус наадалаах, ордук бастакы миэстэни былдьаһыыга. Ити кэмҥэ спортсмен эппиэтинэстээх соругу быһаарар. Бокс – олус дохсун спорт көрүҥэ. Тактиканы киирсэ сылдьар салайан биэриэхэ наада. Тренер тылын истиэхтээх. Маны барытын Сидоров ситистэ. Саастаах көлүөнэ боксердар, тренердэр ааттарыттын кинини маастар нуорматын толорбутунан эҕэрдэлиибин», — диэтэ кини.
Кэлэр сылтан Александр Федотов аатынан турнир өссө бөдөҥ статустанар — Россия чемпионатыгар сүүмэрдээһин күрэхтэһии быһыытынан барыаҕа. Ол туһунан Ил Дархан Айсен Николаев дойду боксаҕа Федерациятын президенэ Умар Кремлевы кытта көрсүһүүтүгэр эппитэ. Сиһилии https://ysia.ru/maksim-kupriyanov-turnir-aleksandra-fedotova-razvivaet-yakutskij-boks-vsestoronne/.
