Бу күннэргэ Москва куоракка саха норуотун чулуу, чаҕылхай уола Максим Кирович Аммосов түһүүлээх-тахсыылаах олоҕун кэпсиир кинигэ күн сирин көрдө. Саҥа таһаарыы «Молодая гвардия» издательствоҕа бэчээттэннэ.
Максим Кирович Аммосов туһунан кинигэни биир дойдулаахпыт, суруйааччы, суруналыыс, Саха сирин духуобунаска академиятын академига, республика суруйааччыларын ассоциациятын бэрэссэдээтэлэ Олег Сидоров суруйан таһаарда.
Ааптар дьоһун үлэтин бастакы экземплярын Саха сирин бэрэстэбиитэлистибэтигэр буолбут үөрүүлэх быһыыга-майгыга өрөспүүбүлүкэбит Бастакы Бэрэсидьиэнигэр Михаил Ефимович Николаевка туттарда. Туһааннаах тэрилтэ салайааччыта Юрий Куприянов эмиэ кинигэни тутта.
«Максим Аммосов» кинигэни олус иһирэхтик уонна дьоһуннаахтык суруйбутугар Лена Максимовна Аммосова дьиэ-кэргэнин аатыттан Владимир Гольдберг Олег Сидоровка махтанна.
Ааптар үлэтэ күн сирин көрөрүгэр күүс-көмө буолбут дьонҥо сүгүрүйэрин биллэрэр. Сахабыт сирин олохтоохторо сотору кэминэн «Максим Аммосов» кинигэни сэргээн туран ааҕыахтара диэн кини эрэнэрин биллэрдэ.
