Майа кыысчаана саха ох саатыгар бастакы маастар буолла

0
564

Үөһээ Бүлүүтээҕи Манчаары оонньууларын бырагырааматыгар саха ох саатынан ытыы аан маҥнай киллэрилиннэ.


Бу саҥа, сонун көрүҥҥэ Эркээни хочотуттан ох курдук оҥостон кэлбит Хаҥалас улууһун хамаандата хаардыы хаамта. Олохтоохтор туруорбут бастакы хамаандалара иккистээтэ. Дьокуускайдар үһүс көрдөрүүлэннилэр. Инньэ гынан, бэйэлэрин бөлөхтөрүгэр Дьокуускай, Хаҥалас, Томпо уонна Өлөөн улуустарын хамаандалара кыайдылар.

Хамаанданан түмүк тахсыбытын кэнниттэн саамай кэрэхсэбиллээх киирсии үһүс бүтэһик күҥҥэ тэрилиннэ. Кыргыттар, дьахталлар саха төрүт ох саатынан ытыыга Саха сирин спордун маастарын бастакынан ылар иһин киирсиилэригэр, Мэҥэ Хаҥалас улууһуттан Майа орто оскуолатын үөрэнээччитэ, 14 саастаах Евгения Титова бэргэнник ытыалаан, бэйэтиттэн быдан аҕа саастаах эдьиийдэрин кэннигэр хаалларда уонна СӨ спордун маастарын нуорматын толорбутун туоһулуур дастабырыанньаны бастакынан тутта. Женя 43 киһиттэн бастаабыта – улахан ситиһии. Кини Прокопий Васильевка үһүс сылын дьарыктанар.

Уолаттар улахан дьону кытта эмиэ бииргэ ыттылар. Барыта 48 киһи күрэхтэспититтэн Дьокуускай олохтооҕо Балдар Балданов бастаан, ох саанан ытыыга эр дьоҥҥо иккиһинэн маастар буолары ситистэ. Охчуттар күрэхтэһэ сылдьар саалара Бүрээтийэҕэ оҥоһуллан кэлэр эбит. Ол таайан-тардан, бүрээт хоһууна кыайдаҕа дуу…

0
0

Хоруй суох

Хоруйдаа