Мэҥэ Хаҥалас улууһун киинигэр «Лесной» түөлбэ «Майа бастыҥ түөлбэтэ» көрүү-куонкуруһугар 2018 сыл түмүгүнэн үһүс миэстэ буолбута. 200 тыһ. солк. граҥҥа тиксибитэ. “Леснойдар” бу үптэринэн уонна олохтоохтор кыттыһан Дьиэ тутуннулар.
Майатааҕы «Лесной» түөлбэ Дьиэтин акылаата балаҕан ыйын 9 күнүгэр түспүтэ уонна 20 хонугунан бүтэн үлэҕэ киллэриллибитэ. Алтынньы 5 күнүгэр Дьиэ үөрүүлээх аһыллыытын тэрээһинэ ыытыллыбыта.
Дьиэ аһыллыаҕыттан түөлбэ олоҕо биллэ-көстө сэргэхсийдэ. Уопсастыбаннай үлэ былаана нэдиэлэнэн тахсан иһэр. Оптуорунньук ахсын Ольга Иннокентьевна , Анатолий Константинович Захаровтар күнүс 2 чаастан дуобакка, саахымакка дьарык ыыталлар. Чэппиэр күн Мотрена Семеновна Харитонова, Аграфена Ивановна Эверстова, Антонина Петровна Куприянова, Ольга Иннокентьевна Захарова иис күнүн тэрийэллэр. Түөлбэ биир ытык кырдьаҕаһа бу күннэргэ Саҥа дьылга түөлбэ бырааһынньыгар бэлэмнэнэн, Моруос Оҕонньор көстүүмүн тигэ сылдьар.
Түөлбэ иһигэр олохтоохтор үс бөлөххө хайдыһан, күрэхтэһии ыыталлар. Сэтинньи 17 күнүгэр дартска, хабылыкка, хаамыскаҕа бэрт көхтөөх киирсии буолла. Ол түмүгэр түөлбэ илин өттүгэр олорор «Үрүҥ күн» бөлөх бастаата. «Барҕарыы» бөлөх иккис буолла.
Бу ыытыллар үлэни түөлбэ салайааччыта Васианна Иннокентьевна Птицына бэйэтэ иилиир-саҕалыыр. Киниэхэ түөлбэ актыыба күүс-көмө буолар.
Дьиэ буолан баран көрүүнү-истиини эрэйэр. Күһүн үлэҕэ киллэриллэн, гаас ситимигэр холбоммотоҕо. Өрөспүүбүлүкэҕэ биллэр рационализатор, Майа бочуоттаах олохтооҕо, түөлбэ төһүү киһитэ Константин Иннокентьевич Неустроев бэйэтэ айан оҥорбут оһоҕун туруорар, күҥҥэ биирдэ маһынан оттуллар, сылааһы күүскэ тутар. Оһоҕу Дмитрий Семенович Птицын көрөн-истэн оттор. Кини 25-с сылын Майатааҕы баһаарынай чааска суоппарынан үтүө суобастаахтык үлэлиир, иллэҥ кэмигэр түөлбэтин үлэтигэр көхтөөхтүк кыттар.
“Леснойдар” дьиэлэрин аана Майа олохтоохторугар куруук аһаҕас. Сэтинньи 21 күнүгэр күнүс 2 чаастан түөлбэ ытыктанар олохтооҕо, норуот маастара, Майа бочуоттааҕа Аграфена Ивановна Эверстова сахалыы иискэ маастар-кылааһыгар ыҥыраллар. Киириитэ ‒ босхо.
«Лесной» түөлбэ олоҕо сэргэхсийдэ. Инникитин араас бырайыактары бэлэмнииргэ, граннар куонкурустарыгар кыттарга үлэлииллэр. Эдуард Николаевич Яковлев докумуоннары, балаһыанньалары истэ-билэ, бэлэмнии сылдьар, ону таһынан кини түөлбэтин олоҕун видеоҕа устан архыыптыыр.
Түөлбэ хас биирдии киһи дьоҕурун таһааһар, дьолун түстүүр, олоҕун оҥостор төрүт сирэ буоларын “Леснойдар” үтүө холобурдара туоһулуур.
Ааптар: Евдокия Решетникова, Мэҥэ Хаҥалас улууһа.
