Власий Васильевич Кубаров 1918 с. балаҕан ыйын 14 күнүгэр Маалтааны нэһилиэгин Тоҥуулаах учаастагар Арыылаахха төрөөбүтэ. Аҕата Василий Алексеевич Кубаров, ийэтэ Мария Григорьевна Кубарова. Кини оҕо сааһа олус ыарахан кэмҥэ ааспыта. Сэбиэскэй былаас саҥа олохтонуутун, алдьархайдаах Аҕа дойду Улуу сэриитин ыар сыллара, аччыктааһын, сут-кураан дьылларын охсуулара тыа дьонун олоҕун олус айгыраппыта. Ордук оҕо-аймах улаханнык оҕустарбыта.


Власий Кубаров Тоҥуулаах начаалынай оскуолатын үөрэнэн бүтэрбитэ. Үөрэҕи ылынымтыа эбит. Холкуоска, сопхуоска араас үлэни толорбута. Суотчутунан, ларыак атыыһытынан, нолуок агенынан, от-мас тиэйээччинэн, өр сылларга заправщигынан, баанньыкка үлэлээбитэ. Ити курдук 1983 сылга диэри олоҕун барытын үлэҕэ анаабыта.

1950 с. Анна Николаевна Тимофеевалыын ыал буолбуттара. 13 оҕону төрөтөн, иитэн дьон оҥортообуттара. 60-ча сыл иллээхтик, эйэлээхтик олорон, 38 сиэн, 53 хос сиэн, 2 хос-хос сиэн эбэтэ, эһэтэ буолар дьолу билбиттэрэ. Анна Николаевна 2011 с. ыалдьан олохтон туораабыта.

«Биһиги аҕабыт киһи быһыытынан амарах, үчүгэй, эйэҕэс майгылаах, туруу үлэһит. Эдэр эрдэҕиттэн араас үлэҕэ эриллибитинэн, олоххо уопутунан, элбэҕи билэринэн аймахтарыгар, оҕолоругар, сиэннэригэр сүбэлии-амалыы олорор. Аҕабыт барахсан Орто дойдуга биир үйэ олордо. Олох бары үөрүүтүн, очурун-чочурун, кэргэн, оҕо тапталын, дьонун-сэргэтин убаастабылын толору биллэ«, — диэн кэпсиир кыыстара Анна Кубарова, Маалтааны нэһилиэгин музейын салайааччыта.

Власий Васильевич айылҕаттан бэриллибит кытаанах доруобуйалаах, онно сөптөөх билиилээх-көрүүлээх, мындыр буолан билиҥҥэ диэри эт өйүн ыһыктыбакка, хаһыатын, кинигэтин ааҕар, тэлэбиисэри сэҥээрэн көрөр, дьиэ иһигэр бэйэтин наадатыгар турар-олорор. Аан дойду бэлиитикэтин ордук интэриэһиргиир.

Ытык кырдьаҕас дьиҥнээх төрөөбүт сыла, күнэ чуолкайданан, билигин холкутугар түһэн олорор. Арҕаа Хаҥалас улууһун 1921-1926 сс. подворнай кинигэтигэр суруллубутунан, Саха Өрөспүүбүлүкэтин Арҕаа Хаҥалас улууһун Маалтааны нэһилиэгэр 1918 сыл балаҕан ыйын 14 күнүгэр төрөөбүтэ туоһуланна, суутунан көмүскэннэ.

Маныаха улуус архыыбын үлэһитигэр Николай Прокопьевич Варламовка оҕолоро, чугас дьоно, биир дойдулаахтара улахан махталларын тиэрдэллэр. Маны тэҥэ Власий Васильевич сиэнигэр Власий Прокопьевич Андреевка, итэҕэллээх киһи быһыытынан, эһэтин интэриэһин суукка көмүскээбитин киэн тутта кэпсииллэр.

Маалтааны нэһилиэгин кырдьаҕас олохтоохторугар Алексей Михайлович Алексеевка, Николай Федотович Сидоровка, Анна Николаевна Потаповаҕа сөптөөх бигэргэтии сурук биэрбиттэригэр эмиэ махтанабыт.

Ааптар: «Үлэ күүһэ» хаһыат

0
0
comments powered by HyperComments