Соторутааҕыта Максим Аммосов аатынан ХИФУ педагогическай институтугар мөлтөхтүк саҥарар оҕону фонетическай ритмика көмөтүнэн көннөрөн, сайыннаран, оскуолаҕа бэлэмниир «Чугдаарар дорҕоончугум» кинигэ сүрэхтэниитэ буолла.
Мөлтөхтүк саҥарар оҕону тылын көннөрөр, сайыннарар сахалыы үөрэх тэрилтэлэрин логопедтарыгар, дефектологтарыгар, иитээччилэригэр уонна учууталларга, төрөппүттэргэ, устудьуоннарга ааптардар Светлана Артемьева уонна Наталья Кребс бэртээхэй кинигэни утары ууннулар.
Методическай босуобуйаҕа саҥарар тылыгар кэһиллиилээх оҕону кытта үлэҕэ “Оҕо оонньоон улаатар” диэн норуот этэрин курдук, тылы көннөрөн сайыннарарга араас хайысхалаах оонньуу-эрчиллиилэр киирдилэр. Ол курдук, оҕо сөптөөхтүк тыынан, эт-сиин (төбө, атах, илии) араас хамсаныытын кытта биир тэтимнээхтик, ситимнээхтик дорҕоону (сүһүөҕү, тылы, этиини) саҥаран таһаарыытын билиһиннэрдилэр.
— Бу ньыманы мөлтөхтүк саҥарар оҕону кытта үлэҕэ киллэрэн, оонньоон эрчиллиэххэ сөп. Оччоҕо оҕо төрөөбүт тылын дорҕоонун сөпкө саҥара үөрэнэр. Моториката, саҥарар кэмигэр тыыныыта сайдар. Куолаһын сөптөөхтүк уларытан саҥарарыгар көмөлөөх буолар. Хас биирдии дорҕоону сүһүөххэ, тылга, этиигэ чуолкайдык саҥарар, сөптөөхтүк арааран истэр буолар, — диэн бэлиэтиир кинигэ ааптара Светлана Артемьева.
Оҕо оскуолаҕа киирэригэр тыла-өһө сайдыбыт, билиитэ-көрүүтэ сааһыгар толору эппиэттиир буолуохтаах. Ити ирдэбилгэ, хомойуох иһин, доруобуйаларыгар хааччахтаах, ол эбэтэр тыл сайдыытыгар уопсай хаалыылаах оҕо, үөрэх стандартыгар толору эппиэттииргэ араас мэһэйдэри көрсүөн сөп.
Кинигэ презентациятыгар тыл эппит учуонайдар бу анал үлэҕэ үрдүк сыанабылы биэрдилэр. Бу фонетическай ритмика методикатын уһуйааҥҥа киириэн иннинээҕи саастаах, оскуолаҕа тылыгар кэһиллиилээх оҕону кытта үлэҕэ туһаныахха уонна омук дьонугар саха тылын үөрэтэргэ бастакы хайысха быһыытынан туттуохха сөп.
Альбина ПЕРМЯКОВА,
Ааптар хаартыскаҕа түһэриитэ, edersaas.ru
