Людмила Кулаковская төрөөбүтэ 70 сыла

 

Людмила Реасовна Кулаковская баара буоллар, бэс ыйын 26 күнүгэр 70 сааһын туолуох этэ.

Кини – филологическай наука кандидата, ХИФУ А.Е.Кулаковскай аатынан институтун дириэктэринэн үлэлээбитэ. 1948 с. бэс ыйын 26 күнүгэр Алексеевскай оройуон Ытык Күөл с. Татьяна Паповна Заболоцкая уонна суруйааччы, учуутал, фольклорист Реас Алексеевич Кулаковскайдар дьиэ кэргэттэригэр бэһис оҕонон күн сирин көрбүтэ.

edersaas.ru

Людмила Кулаковская Чурапчы орто оскуолатын бүтэрэн, култуура уонна искусство Москватааҕы институтугар үөрэнэ киирбитэ. Үрдүк категориялаах бибилэтиэкэр идэтин ылан, үлэтин А.Пушкин аатынан Национальнай бибилэтиэкэ кыраайы үөрэтэр отделыттан саҕалаабыта. Аҕатын этиитин толорон, 1993 сылтан науканан, чинчийэр үлэнэн дьарыктаммыта. Элбэх үлэтин ортотугар Алексей Елисеевич Кулаковскай туһунан 7 кинигэни бэчээттэппитэ. Аҕата бастакы баҕата – А.И.Софронов уонна Өксөкүлээх Өлөксөй убайа И.Е.Кулаковскай-Оонньуулаах Уйбаан бэчээттэнэ илик айымньыларын булан таһаарыы, иккиһэ – дойдуларыгар Амыдайга аҕа ууһун мемориальнай комплексын тутуу, үсүһэ эһэлэрин айар үлэтин чинчийии этэ.

Өрөспүүбүлүкэ нэһилиэнньэтэ 2014 с. Реас Алексеевич Кулаковскай төрөөбүтэ 100 сылын киэҥ хабааннаахтык бэлиэтээбитэ. Кыыһа Людмила Реасовна улахан күүһүн аҕатын айар үлэтигэр уурбута. Аҕатын бэчээттэммит уонна бэчээттэнэ илик үлэлэриттэн үс кинигэ хомуурунньуга тахсыбыта.

Людмила Реасовна преподавателлыыр уонна чинчийэр үлэтин таһынан суруйааччылар, олоҥхоһуттар айымньыларын хомуйан таһаарыынан, саха норуотун уһулуччулаах бэрэстэбиитэллэрин ааттарын үйэтитиинэн дьарыктаммыта.

Өксөкүлээх Өлөксөй, Алампа, И.Е.Кулаковскай уо.д.а. олохторун уонна үлэлэрин туһунан докумуоннары булаары, 35 сыл устата Арассыыйа араас архыыбыгар үлэлээбитэ. П.А.Ойуунускай, Н.Е.Мординов-Амма Аччыгыйа, Д.К.Сивцев-Суорун Омоллоон уо.д.а. тустарынан урут биллибэт докумуоннары архыып пуондаларыттан булбута.

1994-1995 сс. спонсордар уонна бэйэтин үбүнэн Амыдайга Кулаковскайдарга анаммыт мемориальнай комплексы туттарбыта.

Л.Кулаковская «Билии» уопсастыба нөҥүө араадьыйаҕа уонна тэлэбиисэргэ Саха сирин норуоттарын духуобунай баайдарын туһунан дириҥ ис хоһоонноох лиэксийэлэри ааҕан, нэһилиэнньэ улахан биһирэбилин ылбыта. Лиэктэр бастыҥа аан дойдутааҕы, бүтүн Арассыыйатааҕы уонна өрөспүүбүлүкэтээҕи элбэх научнай кэмпириэнсийэлэргэ кыттыбыта.

Олоҕун аргыһа Александр Васильевич Лыглаевтыын 37 сыл дьоллоохтук олорбуттара. Александр Васильевич биллиилээх учуонай, техническэй наука доктора этэ. Кыыстара Анастасия Александровна юрист, уоллара Павел Александрович экономист идэлээхтэр. Сиэннэр улааталлар.

Людмила Реасовна научнай-педагогическай үлэтигэр ситиһиилэрин иһин Ил Түмэн, СӨ бырабытаалыстыбатын бэрэссэдээтэлин, СӨ вице-президенин Бочуотунай грамоталарынан уо.д.а. наҕараадаламмыта, Таатта улууһун уонна Амма нэһилиэгин бочуоттаах гражданина, СӨ Духуобунаһын академиятын бочуоттаах академига, СӨ култууратын үтүөлээх үлэһитэ этэ.

«Саха сирэ» хаһыат, edersaas.ru

1
0

This post was published on 27.06.2018 17:34 17:34