Фермердэр таһымнарын үрдэтии, олохтоох ыраас бородууксуйаны чинчийэр биир түннүк, смартфоҥҥа Саха сирин бары туристскай өҥөлөрүн биэрэр сыһыарыы — бу бырайыактары Дьокуускайга “Лига лидеров” форум кыттыылаахтары киллэрдилэр.
“Лига лидеров” икки сыллааҕыта “Анаабыр алмаастара” хампаанньа генеральнай дириэктэрэ Павел Маринычев салалтатынан киирбитэ. Састаапка “МИНИСТР” оонньууттан 14 хамаанда киирбитэ. Кинилэр бары оройуоннарга анал десаннары тэрийэн тиийэ сылдьыбыттара.
Бырайыактары дьүүллүүр жюри сыаналаата, манна Саха сирин экэниэмикэтин миниистирин э.т. Денис Белозеров, бырамыысыланнас миниистирин э.т. Максим Терещенко уо.д.а. киирдилэр. Кинилэри өрөспүүбүлүкэ премьер-миниистирэ Евгений Чекин салайда.
Форум кыттыылаахтарын тыа хаһаайыстыбатын сайдыытын тиэмэтэ интэриэһиргэттэ. Амма уонна Томпо улуустарын оробуочай десаннара козалары уонна кууруссалары иитэр фермалары тэрийэр туһунан этии киллэрдилэр. Нерюнгрилар олохтоох бородууксуйаны, чуолаан, балыгы чинчийэр биир кэлим түннүгү олохтуурга эттилэр.
Ол эрээри жюри Аллараа Бэстээххэ тыа хаһаайыстыбатын бородууксуйатын харайыыны уонна тарҕатыыны көрөр кууһунан харайар-тарҕатар киини тэрийии былаанын сэргээтэ.
Иккис кэрэхсэнэр хайысханан туризм буолла. Бүлүү улууһун хамаандата кумах тукулааннар базаларыгар туристскай базаны тэрийэр наадатын ыйда. Уус Алдан десана Бороҕоҥҥо Мүрү эбэ таһыгар элбэх өҥөнү оҥорор сынньалаҥ киинин тэрийэри наадалааҕынан аахта.
Хамаандалар “МИНИСТР” өрөспүүбүлүкэтээҕи дьыалабыай оонньууну саҥа форматынан ыытарга сонун идеяны сахтылар.
Айал Яковлев,
Мария Васильева түһэриитэ.
