Өрөспүүбүлүкэҕэ барыта 2631 тэрилтэ кэлэктиип дуогабарын түһэрсэн үлэлиир. Ити өрөспүүбүлүкэ тэрилтэлэрин улахан аҥаара. Дуогабар эбэһээтэлистибэлэрин толорууга 1 230,8 мөл. солк. төлөммүтүттэн, айан ороскуотугар – 60%, үлэ усулуобуйатын тупсарыыга 20% барбыт. Сиһилии edersaas.ru көрүҥ.
Ааспыт сылга тэрилтэ салайааччыларын хамнастарын төлөөһүн хаамыыта дьэҥкэ буоларын туһуттан, хааччахтааһын олохтоммута. Судаарыстыбаннай тэрилтэ салайааччытын орто хамнаһа үлэһитин хамнаһыттан 4 төгүл, судаарыстыбаннай унитарнай тэрилтэлэргэ 5, акциялаах уопсастыбаларга (акцияларга судаарыстыба өлүүтэ баар буоллаҕына) 6 төгүл үрдүк буолуо суохтаах. Ону тэҥэ унитарнай тэрилтэлэр салайааччыларын бириэмийэлэрэ төһө барыһы киллэрбиттэриттэн уонна бүддьүөттэн төһө субсидия ылбыттарыттан тутулуктаах.
Үлэ, социальнай сайдыы министиэристибэтэ хамнаска иэстээх тэрилтэлэри кытта ыкса үлэлэһэр. Ол курдук итиннэ сыһыаннаах биэдэмэстибэлэр икки ардыларынааҕы хамыыһыйаҕа ИДьМ уонна Силиэстийэлиир кэмитиэт управлениетын бэрэстэбиитэллэрэ киирбиттэрэ.
Тохсунньу 1 күнүгэр хамнаска иэс 115,3 мөл. солк. тэҥ этэ (1292 үлэһиккэ). Итинтэн эстибит тэрилтэлэр 56,5%-нын ылаллар (73,9%). Бу тэрилтэлэр хамнаска иэстэрин төлүүллэрин түргэтэтэр сыалтан, нолуок сулууспатын управлениета уонна министиэристибэ бииргэ үлэлииргэ илии баттаспыттара.
2016 сыл устата 108 үҥсүү киирбитигэр, түргэнник миэрэ ылыллыбыт. Ол курдук көмүһү хостуур артыаллар үлэһиттэригэр хамнастарын төлөөбөккө сылдьыбыттарын хонтуруоллаан, кэмигэр төлөнүллэрэ ситиһиллибит.
Оттон үлэтэ суохтар ахсааннара 2 тыһыынчанан кыччаан, 34,7 тыһ. киһи буолбут. Дьарыктаах буолуу кииннэригэр 11,9 тыһыынча киһи учуокка турбут (былырыын 9,8 тыһ. киһи этэ). Ол аата үлэттэн ууратыы уонна тэрилтэ сабыллыыта элбии турар кутталлаах.
Ыспыраапка
Өрөспүүбүлүкэҕэ орто хамнас 55 545 солкуобайга тэҥ. Ити 2015 сылга тэҥнээтэххэ, 5,6%-нан улааппыт. Орто хамнас кээмэйинэн Уһук Илин уокурук регионнарыгар Саха сирэ 5-с миэстэлээх.
2016 сыл от ыйын 1 күнүгэр хамнас алын кээмэйэ (МРОТ) 9,3%-нан үрдээн, 16824 солк. тэҥнэспитэ. Ити өрөспүүбүлүкэҕэ тиийинэн олоруу кээмэйиттэн кырата суох суума.
