Токиоҕа ыытыллыахтаах Олимпиадаҕа сүүрүк Сардаана Трофимова, дзюдоистка Нюргуяна Никифорова, боксер Василий Егоров кыттыахтарын сөбүн туһунан НВК «Саха» араадьыйатыгар сүүмэрдэммит хамаандалары бэлэмниир спортивнай киин дириэктэрэ Леонид Спиридонов эттэ. Спортсменнар квалификацияларын сотору буолар күрэхтэргэ быһаарыахтара.
«Арассыыйа хамаандатын састаабыгар Сардаана Трофимова ааһыа диэн эрэнэбит. Ахсынньы 6 күнүгэр кини Сочига Арассыыйа чөмпүйэнээтигэр марафон сүүрүөхтээх. Бары билэрбит курдук билигин дойду чэпчэки атлетикаҕа спортсменнарын Олимпиадаҕа кытыннарар боппуруос быһаарылла сылдьар. Дзюдоҕа Нюргуяна Никифороваҕа эрэнэбит. Кини билигин Арассыыйаҕа үһүс сылдьар. Спорт бу көрүҥэр сүүмэрдээһин спортсмен кэккэ күрэхтэргэ кыттыбыт рейтининэн оҥоһуллар. Василий Егоров буолаары турар Арассыыйа чөмпүйэнээтигэр кыайдаҕына, дойду сүүмэрдэммит хамаандатын састаабыгар квалификационнай турнирга барыа», — диэтэ Леонид Спиридонов.
Маны таһынан Токиотааҕы Олимпиадаҕа Саха сирин легионер-тустууктара кыттар кыахтаахтар.
