Олортон биир бастакылара – былырыын үлэҕэ киллэриллибит Ийэ уонна оҕо клиниката.

Айсен Николаев болҕомтотун быраастар, анаалыс ылар кэбиниэттэр араспысаанньаларыгар уурда. Клиникаҕа ыарыһахтары көрсөр отделениены, дьоҕус эпэрээссийэлэр оҥоһуллар кэбиниэттэрин көрдө. Ханнык баҕарар балыыһаҕа биир сүрүн оруолу эмтиир тиэхиньикэнэн хааччыллыы ыларынан, клиника тиэхиньикэнэн хааччыллыытын интэриэһиргээтэ.

Онно биллибитинэн, бачча улахан дьиэҕэ рентген-кэбиниэт суох эбит. Тоҕо диэтэххэ, саҥа дьиэ рентген тиэхиньикэтин ууруу ирдэбиллэригэр эппиэттээбэт.

Ленскэй улууһун киин балыыһатын кылаабынай бырааһа Леонид Егоровиһитиннэрбитинэн, саҥа дьиэ үлэҕэ киирэн, оройуон поликлиникатын ноҕурууската биллэ кыччаабыт. Клиника хас биирдии отделениетыгар анаалыстар сүрүн көрүҥнэрин ылаллар.

Айсен Николаев: “Нэһилиэнньэ доруобуйа харыстабылыгар уонна эмтээһин хаачыстыбатыгар сыһыаннаах боппуруостары ордук интэриэһиргиир. Ленскэй олохтоохторо наадалаах көмөнү толору уонна сөптөөх таһымҥа ылалларын туһугар үлэни хайдах тэрийэр туһунан өрөспүүбүлүкэ Доруобуйатын харыстабылын министиэристибэтин кытары үлэлэһиэххэ наада”, – диэн нэһилиэнньэ туһугар өссө күүскэ үлэлииргэ эттэ.

ЫСПЫРААПКА:

Ленскэй куоракка Ийэ уонна оҕо клиниката 2017 с. алтынньы 31 күнүгэр үөрүүлээх быһыыга-майгыга аһыллыбыта. Саҥа объект төһө да элбэх ороскуоту эрэйбитин иһин, оройуон кэрэ аҥаардарыгар уонна оҕолорго саҥа, аныгы балыыһа бастакы уочарат наадатын учуоттаан, улуус бүддьүөтүн суотугар тутан, ылыммыт соруктарын тиһэҕэр тириэрдибиттэрэ. Саҥа дьиэни “777” САУо туппута.

Аныгы дьиэҕэ оҕо поликлиниката, дьахталлар консультациялара, медицинскэй көрүү отделениета уонна доруобуйа мобильнай киинэ үлэлииллэр. Манна күҥҥэ 200-чэ киһи көрдөрүнэр.

Надежда ЕГОРОВА, “Саха сирэ” хаһыат,  edersaas.ru

1
0
comments powered by HyperComments