2017 с. статистика кэтээн көрүүтүгэр 1653 тэрилтэ хабыллыбытыттан 130-гар үлэ кэмигэр дэҥ-оһол таҕыста.
2016 с. 231 киһи эмсэҕэлээбитэ бэлиэтэммит буоллаҕына, былырыын – 275 киһи. Ол иһигэр, киһи өлүүлээх дэҥ-оһол 16 бырыһыан улаатта.
Элбэх эчэйии туһалаах баайы хостооһун (77 киһи), тутуу (61) уонна тырааныспар (48) салааларыгар таҕыста. 2016 сылга тэҥнээтэххэ, хомолтолоох түгэнтэн сылтаан эчэйбит дьон ахсаана ордук Мииринэй (49) Ленскэй (26), Нерюнгри (25), Алдан (22) уо.д.а. оройуоннарыгар эбилиннэ. Оттон Дьокуускай куоракка эмсэҕэлээбит дьон ахсаана, 2016 сылы кытта тэҥнээтэххэ, 7,6% аҕыйаата (85 киһи).
Үлэ кэмигэр эчэйиини таһаарбат туһуттан СӨ Үлэҕэ уонна социальнай сайдыыга министиэристибэтигэр Саха сирин тэрилтэлэригэр «нулевой» эчэйии бырагырааматын киллэриигэ методическай сүбэлэр оҥоһуллубуттара. СӨ бырабыыталыстыбата 2018 сылга Саха Өрөспүүбүлүкэтигэр производственнай эчэйиини аҕыйатыыга хайысхаламмыт дьаһаллары ылыммыта. Ол чэрчитинэн үлэ кэмигэр тахсыбыт эчэйиилэр төрүөттэрин ырытыы, тустаах дьон эппиэтинэстэрин үрдэтии, үлэни биэрээччилэргэ уонна үлэһиттэргэ куттал суох буолуутун быраабылаларын тутуһуннарыы киирэллэр.
Надежда ЕГОРОВА, «Саха сирэ» хаһыат, edersaas.ru
