Өлбүт киһи баанын каартатыттан харчыны устуу — олоххо итинник эмиэ буолар эбит.

edersaas.ru

Мирнэй полициятын дьуһуурунай чааһыгар биир киһи кэлэн, кини өлбүт аҕатын баанын каартатыттан ким эрэ 18 тыһ. солк. устубутун туһунан иһитиннэрбит.

Суһал-ирдиир тэрээһиннэр кэмигэр оперативниктар бу уорууга уорбаланааччыны туппуттар — Архангельскайтан төрүттээх, 58 саастаах ыаллара киһи эбит.

Барыллаан быһаарыынан, эмсэҕэлээччи аҕата өссө тыыннаах эрдэҕинэ, бэйэтэ кыайан хаампат буолан, ыала киһини маҕаһыынтан ас ыллара ыыппыт. Онуоха баанын каартатын биэрбит.

Ыарытыйар киһи көрдөһүүтүн кини толорбут эрээри, баанын каартатын төннөрбөтөх, бэйэтигэр хаалларыммыт. Онтон кырдьаҕас өлбүтүн кэнниттэн, каарта пин-кодун билэр буолан, ол онтон харчы устубут уонна ас, арыгы ылына сылдьыбыт.

Бу чахчынан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0

0
0
0
comments powered by HyperComments