«Өлүөнэтээҕи холбоһуктаах пароходство» тэрилтэтэ Абый улууһугар хаарбах дьиэттэн көһөрүү бырагырааматынан олорор дьиэлэри тутууга үлэлэһиэ. Пароходство дириэктэрэ Сергей Ларионов уонна Абый улууһун баһылыга Станислав Цюхцинскай бу күннэргэ ити боппуруоһу дьүүллэстилэр.
Дьон олорор дьиэлэрин эргэриитин кыһалҕата Абый улууһугар сытыытык турар. Манна элбэх кыбартыыралаах олорор дьиэ тутуллубатаҕа 40-ча сыл буолбут. «Өлүөнэтээҕи холбоһуктаах пароходство» 2025 сылга диэри хаарбах дьиэттэн көһөрүү бырагырааматынан элбэх кыбартыыралаах дьиэ тутуутугар ылсар былааннаах.
Кэнники сылларга тэрилтэ Черскэй бөһүөлэгэр оскуола, Жатайга 9 этээстээх олорор дьиэни, Уус-Маайа Петропавловскайыгар оҕо саадын тутан киллэрбит.
