“ЛОРП” ААУо-тан Индигииргэ ньиэп бородууктатын тоҕуу иһин Абый муниципальнай оройуонун бүддьүөтүгэр 7,9 мөл солкуобайы ирдээн ыллылар, диэн СИА-ҕа Саха сирин Айылҕа харыстыбылын министиэристибэтин пресс-сулууспата иһитиннэрдэ.
Көрүү кэмигэр Белай Горатааҕы суудуна сырыытын учаастагын бас билиитигэр баар СПН-706 суудуна ньиэби тохпутун чахчыта биллибитэ. Ньиэп тохтуутугар суудуна куорпуһа алдьаныыта төрүөт буолбута.
Экологическай чинчийии түмүгүнэн ууга ньиэп бородууктата элбэх тохтубута бэлиэтэммитэ. Туһаныллар нормативнай аакталарга олоҕуран, Индигиир эбэ федеральнай судаарыстыбаннай экологическай кэтээн көрүүгэ киирсэр. Онон административнай быраабы кэһии дьыалата Арассыыйа Айылҕаны кэтээн көрүүгэ Саха сиринээҕи управлениетыгар көрүүгэ бэриллибитэ.
Управление былааны тас өттүнэн “ЛОРП” ААУо-ҕа бэрэбиэркэ ыытан, ити түмүгэр 7 927 375, 50 солкуобайы Абый муниципальнай оройуонун бүддьүөтүгэр ирдээн түһэрбиттэрэ.
