Дьокуускайга Кытайтан «Китайская железнодорожная корпорация 18 бюро» ХЭТ бэрэстэбиитэллэрэ кэлэн, Өлүөнэ өрүһү туоруур муостаны тутуу усулуобуйатын билистилэр.
«Биһиги улахан барыска буолбакка, инникитин Россия ырыынагын дойдубутугар аһар соругу өрө тутабыт», – диэн бу ХЭТ сэкирэтээрэ Чжан Шиан эттэ.
Кытай делегацията бэҕэһээ Аллаараа Бэстээххэ тимир суол станциятыгар, ону таһынан өрүс икки кытылыгар сырыттылар. Кинилэр бырайыак ирдэбилигэр: муоста уһунугар, кэтитигэр, тирэхтэригэр ураты болҕомтолорун уурдулар.
Кинилэр бырыайыак сыаната төһөтүн билиҥҥитэ эппэттэр. Быһа холуйан 4-5 сыл докумуону оҥорууга, муостаны тутууга барыаҕа. Баҕар, муоста массыына сылдьар уонна тимир суоллардаах буолуоҕа.
Өрөспүүбүлүкэҕэ соторутааҥҥыта муостаны тутар баҕалаах «Синогидро» Кытай компанията кэлэн барбыта.
Чжан Шиан СИА-ҕа эппитинэн, кини күрэстэһээччилэртэн толлубат, тоҕо диэтэххэ, кини үлэлиир компанията ирбэт тоҥҥо мустаны тутууга улахан уопуттаах уонна Кытайга аан бастакынан маныаха анаммыт наука наҕараадатын ылбыт.
«Тибеккэ муораттан 4,2 тыһыынча миэтэрэ үрдүккэ 10 км уһуннаах тимир суолу туппуппут», – диир кини.
Төһө да тутууга уопут баарын иһин, «Китайская железнодорожная корпорация 18 бюро» ХЭТ Россия учуонайдарын уонна муостаны тутааччыларын уопуттарын үөрэтиэҕэ уонна ону туһаныаҕа. «Энономическай барыс иккис былааҥҥа турар», – диир компания бэрэстэбиитэлэ.
