Кулун тутар 16 күнүттэн саҕалаан, «Киин» уонна «Синема-центр» киинэ-тыйаатырдарын хаассаларыгар «Өлүөнэ очуостара» айылҕа пааркатыгар киирии билиэттэр атыыланар буоллулар.
Сандал саас кэлэн, халлааммыт сылыйан, айылҕаҕа сынньана барааччы элбээтэ. Өрөбүл күннэргэ туристическай баазаларга сүүһүнэн, тыһыынчанан киһи сынньанар. «Өлүөнэ очуостара» пааркаҕа ыраахтан айаннаан кэлбит дьон тута киирэллэрин курдук, билигин билиэти эрдэ атыылаһар кыахтаннылар.
Айылҕа паарката былырыыҥҥытан кыһыҥҥы эрэсииминэн эмиэ үлэлиир буолбута. Быйылгы сезон олунньу 25 күнүттэн саҕаламмыта. СӨ Айылҕа харыстабылын министиэристибэтин чахчыларынан, ааспыт өрөбүллэргэ пааркаҕа 3 тыһ. кэриҥэ киһи сынньаммыт.
