Ааспыт өрөбүллэргэ Өлөөн улууһун социальнай эбийиэктэригэр итиини биэрдилэр. Атырдьах ыйын 20 күнүгэр икки күн эрдэлээн Дьэлиҥдэҕэ, 22 чыыһылаҕа Харыйалаах, Өлөөн хочуолунайдара оттулуннулар. Бу туһунан ОДьКХ тэрилтэтэ иһитиннэрэр.
Өлөөннөөҕү ОДьКХ үлэһиттэрэ аҕыс итиини хааччыйар эбийиэги, 34,2 килэмиэтир инженернай ситими уонна алта анал тиэхиньикэни кыстыкка анаан бэлэмнээтилэр.
Санатабыт, атырдьах ыйын 8 күнүгэр хоту бастакынан оттук дьыла Аллайыахаҕа саҕаламмыта. Бүгүн итиинэн Булуҥ, Анаабыр, Аллара Халыма, Өлөөн улуустара хааччыллан олороллор. Ый бүтүөр диэри кыраапык быһыытынан Орто Халыма, Абый, Дьааҥы, Үөһээ Халыма, Муома, Эдьигээн, Эбээн-Бытантай улуустара итиигэ холбонуохтара.
