Саха норуотун биир талааннаах судаарыстыбаннай салайааччыларыттан биирдэстэрэ Илья Егорович Винокуров төрөөбүтэ 120 сыллаах кэрдиис кэмин Өлөөн оройуона бэлиэтиир. Үбүлүөйдээх тэрээһин оскуолаларга «Винокуровскай ааҕыылартан» саҕаламмыта.
Олунньу 17 күнүгэр уопсастыбаннас үөрүүлээх мунньаҕы ыытта. Оройуон Сэбиэтин «Суглан» бэрэссэдээтэлэ Зоя Григорьева: «Илья Егорович Винокуровы Өлөөн оройуонун төрүттээбит киһинэн билинэбит. Нэһилиэнньэ кинини хаһан да умнубат, киниэхэ сүгүрүйэр», — диэн эттэ.
Оройуон бочуоттаах олохтооҕо, сэбиэскэй-хаһаайыстыбаннай тутул бэтэрээнэ Н.С. Николаев, Саха Өрөспүүбүлүкэтин үтүөлээх ветеринарнай бырааһа, оройуон бочуоттаах олохтооҕо В.А. Христофоров, оройуон Сэбиэтин «Суглан» депутата А.Т. Петрова уонна да атын мунньах кыттыылаахтара Илья Винокуров саха норуотугар умнуллубат үтүө дьыалаларын, дойдутун дьонун туһугар олорбут олоҕун үрдүктүк сыаналыылларын уонна эдэр ыччаты кини олоҕун холобуругар, дойду патриоттара буола улааталларыгар баҕаларын эттилэр.
