Өлөөн электростанциятын тутуу салҕанар буолла

Өлөөн улууһун олохтоохторо 2018 сылга үлэҕэ киириэ диэн кэтэспит улахан суолталаах автономнай дизельнэй электростанция тутуута тохтотуллан консервацияҕа турбута. Бу күннэргэ ААУО «Сахаэнерго» Өлөөннөөҕү уотун ситимин салайааччыта Сивцев Гаврил Гаврильевич иһитиннэрбитинэн, ХЭТ ПТК «Гларимак» тутууну салгыы ыытарга ылсыбыт.


Бу дьыл алтынньы ыйга Дьокуускай куоракка ААУО «Сахаэнерго» ыыппыт конкуруһугар кыайыылааҕынан ХЭТ ПТК «Гларимак» тутуу тэрилтэтэ тахсан, Өлөөннөөҕү электростанцияны тутар быраабы ылбыт. Кылаабынай инженер Виктор Валерьевич Полухин консервацияҕа турар Өлөөннөөҕү АДЭС тутуутун балаһыанньатын миэстэтигэр кэлэн билсиһэ.

Барыллаан ааҕыынан, билиҥҥи кэмҥэ Өлөөннөөҕү былаһааккаҕа тутууну үлэҕэ киллэрэргэ наадалаах матырыйааллар 30-ча бырыһыаннара харалла сытар. Онон тутууну үлэҕэ киллэриигэ эбии тутуу матырыйаалын сакаастаан, атыылаһан кыһыҥҥы массыына суолунан аҕалыахтаахтарын кини эттэ. Электростанция тутуута матырыйаал тиэллэн кэллэ да саҕаланарын иһитиннэрдэ. Ол иһин бу күннэргэ итиини биэрэр турба ситимэ оҥоһуллуохтаах.
Дуогабар усулуобуйатыгар сөп түбэһиннэрэн, тутуу 2019 сыл ахсынньы ый 1 күнүгэр үлэҕэ туттарыллыахтаах.

Ааптар: Николай СТРУЧКОВ

This post was published on 19.11.2018 19:22 19:22