Хотугу эргимтэни киин сир суруналыыстара интэриэһиргииллэр. Эбэҥки национальнай улууһун олоҕун-дьаһаҕын, аҕыйах ахсааннаах омуктар билиҥҥи сайдыылаах олоххо хайдах бэйэлэрин салайынан, култуураларын төһө тутан олороллорун туһунан матырыйаал хомуйаллар.
Бу нэдиэлэҕэ Өлөөнү интириэһиргээн камераҕа уста, суруйа-бичийэ Москваттан «Лайф-ньюс» Медиа Холдинг оператора, хаартыскаҕа түһэрээччитэ Сергей Дубровин уонна Ростовскай уобаластан фрилансер (көҥүл суруналыыс) Юлия Корчагина кэлэ сылдьаллар.
6 №-дээх «Өлөөн» МУТ ыстаадатын табаһыттарын кыстык сирдэригэр «Талахтаах» сиригэр-уотугар турар «Күөнэлэкээн» көс оскуолаҕа вахтовканан тахса сырыттыбыт. Манна киин сир суруналыыстара чэбдик салгыҥҥа маанымсыйбыт кыраһыабай табалары, оскуола сытыы-хотуу үөрэнээччилэрин сөбүлээн уһуллулар, хаартыскаҕа түһэрдилэр, интервью ыллылар. Салгыы Өлөөннөөҕү этнографическай музейы, сыана бэтэрээннэрэ Анна Готовцева уонна Надежда Колодезникова эбэҥкилии ырыаларын камераҕа уһуллулар.
«Маннык киинэлэри устан аан дойдуга Өлөөн эбэҥки национальнай улууһа баар эбит, ураты культуралаахтар эбит диэнбиллэрэбит. Дьоҥҥут -сэргэҕит, оҕолоргут олус талааннаахтар, музыкальнай инструменнарга чаҕылхайдык оонньууллар, ыллыыллар, үҥкүүлүүллэр, тыыннаах айылҕаҕа олус чугастар уонна тулуурдаахтар, онон интернет нөҥүө киэҥ эйгэҕэ тахсан дьоҥҥо киэн тутта кэпсииргит, көрдөрөргүт дьиҥ чахчы баар, барыта дьиҥнээх», — диэтэ Сергей Дубровин.
«Өбүгэлэргититтэн харыстаан илдьэ кэлбит дьарыккытын, олоххутун, абыычайдаргытын чугаһатар эбит. Онон маннык дьаһанаргыт сөптөөх, ыччаккытыгар, сиэннэргитигэр тиэрдэргитин сэргээтим. Төһө да аныгы сайдыы үйэтэ кэлбитин иһин, киин сирдэргэ тардыһыы баарын иһин, эһиги айылгыгытынан төрөөбүт сиргитигэр-дьарыккытыгар тардыһыыгыт күүстээх эбит», — диэтэ Юлия Корчагина.
Ыалдьыттарбыт элбэх хаартыскалардаах, видеороликтаах анал саайты аһары, Википедияҕа элбэх информацияны биэрэри, национальнай улуус үтүө аатын үрдэтиигэ хаачыстыбалаахтык үлэлиири баҕа санаа быһыытынан эттилэр.
