Тэрилтэ сүрүннүүр технолога Л. Хамарханова кэпсииринэн, Өлүөхүмэ сыыра үһүс төгүлүн Арассыыйа таһымыгар лауреат үрдүк аатын ылар. “Маҕаһыыҥҥа сыыр эрэ элбэх, онтон астыырга туох кистэлэҥ баарый диэтэххэ, ынах үүтүн аһытан, сычужнай фермени туттан уонна маастар илиитин сылааһын, сүрэҕин иэйиитин биэрэн, киһи айаҕар ууллар, сии эрэ туруоххун баҕарар сыырыҥ тахсар”, — диэн этэр кини.
Аатырбыт Адыгейскай сыыр 2012 сыллаахха «Арассыыйа 100 бастыҥ табаарын» аатын ылбыта.
Өлүөхүмэ сыырыгар икки сылга болдьохтоон бэриллибит сэртипикээт бородууксуйа хаачыстыбатын үрдүк таһымҥа тутарга, норуот биһирэмин түһэн биэрбэт эппиэтинэһи ирдиир. Ону таһынан, сыыр хаатыгар «Арассыыйа 100 бастыҥ табаарын» логотибын туттарга, киэҥник рекламалыырга, билиһиннэрэргэ кыах биэрэр.
Өлүөхүмэ өҥ буоругар төлөһүйэ үүммүт күөх окко мэччийбит ынах-сүөһү үрүҥ илгэтиттэн оҥоһуллубут сыыр сыаната төһө даҕаны ботуччу соҕуһун иһин, маҕаһыыҥҥа былдьаһыгынан бүтэр. Дьон эрдэттэн үлэһэн, сакаастаан ылаллар. Ыраах айаҥҥа, мааны ыалдьыкка күндү кэһии оҥостоллор.
Марианна Тыртыкова, «Саха сирэ», edersaas.ru
