Россия уонна Кытай бырабыыталыстыбаларын икки ардыларынааҕы инвестиционнай бииргэ үлэлээһин хамыыһыйатын быһаарыытынан «Якутия» авиакомпания Кытай инвестиционнай фондатыттан саҥа көтөр аалларынан ситэриллиэҕэ.
Компания тырааныспарын саҥардыы бырайыагын чэрчитинэн магистральнай уонна регионнааҕы көтөр ааллары бас билиигэ ылыахтара. Бу түмүгэр Уһук Илиҥҥэ салгынынан айаҥҥа мэһэй суох буолуута хааччыллыаҕа.
СИА-ҕа эппиттэринэн, инвестор үбү-харчыны компанияҕа угара икки барыйаанынан оҥоһуллуоҕа. Ол курдук, онтон биирэ 5 ВС Боинг 737-800 көтөр ааллары атыылаһыы буолар.
Авиатэрилтэ техническэй дириэктэрэ Александр Зинков этэринэн, эргэ көтөр ааллар саҥардыллыахтара.
Пекиҥҥэ Россия уонна Кытай бииргэ үлэлээһиннэрин чэрчитигэр 66 инвестбырайыак киирбит. Ол иһигэр, «Таежное» баайдаах сири туһаҕа таһаарыы, Өлүөнэ өрүһү туоруур муостаны тутуу уонна «Якутия» авиакомпания көтөр аалларын саҥардыы бааллар.
Саха сирин баһылыга Егор Борисов бу дьаһаллар олоххо киирэр бырайыактар ахсааннарыгар ылыллыбыттарын улахан ситиһиинэн ааҕар.
«Бырабыыталыстыба уһун кэмнээх уонна көдьүүстээх үлэтин түмүгэр бу ситиһилиннэ. Бырайыактар үрдүк анал туруктаналлар. Бүгүҥҥүттэн саҕалаан бырайыактар кэмигэр олоххо киириилэрэ, хаачыстыбалара судаарыстыбалар ырытыыларын киинигэр туруоҕа», — диэтэ кини.
