Улуус киинин биир дьоһун-мааны ыала, Никифоровтар алта сүөһүлээхтэр, ол иһигэр икки ыанар ынахтаахтар. Бу иитимньилэрин кинилэр 12 туонна отунан кыстаталлар. Ыал аҕата Анатолий Аркадьевич хотуурун улууска бастакынан тыаһаппыта, ходуһаҕа от ыйын 10 күнүттэн киирбитэ. Кини кэргэнин Людмила Васильевнаны, кыыһа Уруйдаананы уонна инилэрэ Мишалаах Тиманы кытары илиитинэн оттуур итиэннэ оттообут дьоҕус массыынанан бөһүөлэккэ аҕалан, кыбыытыгар утары кэбиһэн иһэр. Онон, бэрт үчүгэй хаачыстыбалаах оту бэлэмнээтэ.
— Халлаан туран эрэ биэрдэр, былааммытын холкутук толоруохпут, — диир тыа хаһаайыстыбатын улуустааҕы управлениетын начальнига Гаврил Борохин. — Маныаха хаһааска анаан 340 туоннаны оттуохтаах биригээдэлэр төһүү буолуохтара. Билиҥҥитэ сэттэ мобильнай биригээдэ тэриллэн, ыраах учаастактарга оттуу бараары, уматыкка көрүллүбүт харчы кэлэрин кэтэһэллэр. Бу күннэргэ хаһаайыстыбалар сайаапкаларынан уу суолунан уон биэс туонна комбикорм аҕалылынна. Атын улуустартан биир да хаһаайыстыба от эбэтэр сир көрдүү илик.
Уус Маайаттан Евсей Лугинов, «Саха сирэ» edersaas.ru сайтка анаан.
