Дьокуускайдааҕы кырдьаҕастар уонна инбэлииттэр интэрнээт-дьиэлэрин тула соторутааҥҥыта манна олорор Людмила Степанова суругуттан улахан араллаан тахсыбыта. Бүгүн дириэктэр бэйэтэ баҕа өттүнэн үлэтиттэн уурайар туһунан сайабылыанньаны биэрдэ.
Санатар буоллахха, алтынньы 26 күнүгэр «Коммунист» хаһыакка бу дьиэҕэ олорор дьахтар суруга бэчээттэммитэ. Онно кырдьаҕастары аччыктаталларын, концлааҕырга курдук ыарахан усулуобуйаҕа олордоллорун курдук суруллубута. Маны регионнар уонна федеральнай таһаарыылар киэҥник тарҕаппыттара. Ааптар Людмила Степанова барытын ситэри быһаарсыбакка эрэ, быстах санаанан салайтарбытын туһунан билиммитэ.
СИА биллибитинэн, интэрнээт үлэһиттэрэ дириэктэрдэрэ Анна Слепцова уурайарын туһунан бүгүн саҥа билбиттэр. «Сарсыарда кини Үлэ министиэристибэтигэр сылдьыбыта. Ол кэнниттэн арааһа, уурайар туһунан сайабылыанньа суруйда быһылаах», — дииллэр үлэһиттэр.
