Кырдьаҕас дьону көрө-харайа ылар дьиэ кэргэҥҥэ судаарыстыба биэрэр үбүн-харчытын 18 тыһ.солк. диэри эптилэр. Үлэ, социальнай сайдыы миниистирин солбуйааччы Зинаида Максимова этэринэн, 2016 сылга маныаха өрөспүүбүлүкэ бюджетыттан 10-тан тахса мөл.солк. көрүллүбүт.
Кини этэринэн, кырдьаҕас дьон олохторун хаачыстыбатын тупсарыга анаммыт маннык хамсааһын 2013 сылтан ыла Саха сиригэр саҕаламмыт.
Алтынньы 1 күнүнээҕи туругунан 94 дьиэ кэргэҥҥэ 96 киһи олорор. Бу ыалга судаарыстыбаттан пособие төлөнөр. Ити кээмэйэ быйыл 18 тыһ. солк. тэҥнэһэр. Былырыын 16 175 солк. этэ. Ону таһынан кырдьаҕас киһи пенсиятын 75% дуогабар быһыытынан көрүллэр ыалыгар биэрэр. Бүгүҥҥү туругунан пенсия кээмэйэ 13 тыһ.солк.
Дьиэ кэргэн иккиттэн элбэх кырдьаҕаһы ылыа суохтаах. Кинилэр бэйэлэрин дьиэлэригэр эбэтэр саастаах киһи дьиэтигэр көрүөхтэрин сөп.
«Иитэ ылар дьиэ кэргэн ордук тыа сирдэригэр элбэх. Көрүүгэ-харайыыга киирэр дьон орто саастара 75. Хас да маннык дьиэ кэргэн интэрнээттэргэ олороллор«, — диир Максимова.
