Кыра оҕо таһырдьа атах сыгынньах тахсыбыт

0
11

Дьокуускай куоракка олунньу 3 күнүгэр кыра саастаах оҕо таһырдьа атах сыгынньах сылдьарын биир киһи өйдөөн көрө охсон, чугастааҕы эт маҕаһыыныгар көтөҕөн киллэрбитин туһунан сурах бастаан батсаап ситиминэн тарҕаммыта.

edersaas.ru

Бу быһылаан чахчы киин куоракка тахсыбыта сонно биллибитэ — ханнык маҕаһыыҥҥа буолбута ыйыллыбыт этэ.

Бу чахчынан РФ Силиэстийэлиир кэмитиэтин Саха сиринээҕи управлениетын Дьокуускай куораттааҕы салаата процессуальнай бэрэбиэркэ саҕалаабыт.

Силиэстийэ сабаҕалыырынан, олунньу 3 күнүгэр эдэр ийэ 4 саастаах оҕотун аймаҕар көрдөрө хаалларан баран, маҕаһыыҥҥа тахсыбыт. Онтон бу киһи оҕону бэйэтин эрэ хаалларан баран, эмиэ маҕаһыыҥҥа барбыт.

Ол барбыт кэмигэр, кыракый уолчаан сайыһан буоллаҕа уонна соҕотох хаалбытыттан да куттанан буолуо, тас таҥаһа суох, атах сыгынньах кыбартыыраттан сүүрэн тахсыбыт.

Дьолго, 40 кыраадыс тымныыга таһырдьа сыгынньах сылдьар оҕону биир киһи өйдөөн көрөн, чугастааҕы маҕаһыыҥҥа көтөҕөн киллэрбит.

Оҕо тилэхтэрин үлүппүт, ожоговай балыыһаҕа киллэриллибит.

Бэрэбиэркэ түмүгүнэн, процессуальнай быһаарыы тахсыаҕа. 

Батсаапка итини көрбүт туоһу дьахтар суруйарынан, «суһал көмөнү» маҕаһыын үлэһиттэрэ ыҥырбыттар, оттон оҕону бу маҕаһыын суоппара быыһаабыт.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

1

0
0
0