Бэҕэһээ, Дьокуускайга «Туймаада» стадиоҥҥа «Азия оҕолоро» Оонньуу кылыыга күрэхтэһиитэ буолла. Тыаллаах, тымныы халлаан спорт биир чаҕылхай көрүҥэ өрө күүрүүлээх быһыыга-майгыга ыытылларын атахтаабата.
Кыргыттар барыта 11 буолан, кылыыга сэттэтэ ойдулар. Биһиги үөрүүбүтүгэр Саха сирин хамаандатын бастакы нүөмэрэ, Бүлүү кыыһа Светлана Макарова бэрт чэпчэкитик тэлээрэ кылыйан 22,92 миэтэрэни түһэн эрэллээхтик бастаан чөмпүйүөннээтэ.
Киниттэн миэтэрэ кэриҥэ хаалан Сибиирдээҕи федеральнай уокурук спортмена Екатерина Веселькова (21,96 миэтэрэ) үрүҥ, Кэбээйиттэн сылдьар Любовь Кривошапкина (21,90 миэтэрэ) боруонса мэтээллэр хаһаайыннарынан буоллулар.
Уолаттар уон үс буолан, 11-дэ ойон күрэхтэстилэр. Сибиирдээҕи федеральнай уокурук спортсмена Дмитрий Бочкарев көтөн эрэр тэҥэ кылыйа кылбаҥнатан, 40,53 миэтэрэни түһэн соһуталаата. Биһиги уолаттарбыт күүстээх утарсааччыларыттан саллан-толлон турбакка харса суох ойуолаан дайдылар. Ол түмүгэр, Мэҥэ Хаҥалас уола, Саха сирин хамаандатын бастакы нүөмэрэ Дмитрий Дмитриев 40,13 миэтэрэни, Кэбээйиттэн сылдьар Семен Ноговицын 39,76 миэтэрэни түһэн, туһааннааҕынан үрүҥ уонна боруонса мэтээллэри ылар чиэскэ тигистилэр.
Саха национальнай көрүҥэр бастакы күн кылыыга биһиги эдэр спортсменнарбыт үчүгэй бэлэмнээхтэрин, кыайыыга дьулуурдаахтарын көрдөрдүлэр. Бүгүн ыстаҥаҕа күрэх буолар.
