"Кылыыҥкай" Таатта оҕолорун ыырдарын кэҥэтэр

Ф.С. Аргунов аатынан Оҕо искусствотын оскуолатын иһинэн “Кылыыҥкай” оҕо үҥкүү ансаамбыла 1994 сыллаахха тэриллибитэ. Салайааччынан СӨ култууратын үтүөлээх үлэһитэ, “За вклад в развитие народного художественного творчества” бэлиэ хаһаайката Розалия Михайловна Иванова үлэлиир. Күн бүгүнүгэр диэри улуус аатын аар-саарга ааттата, айа-тута, оҕолору үҥкүү кэрэ абылаҥар угуйа сылдьар.


Тааттатааҕы “Кылыыҥкай” оҕо үҥкүү образцовай ансаамбыла саха норуотун баай ис хоһоонноох историятын, култууратын дойду араас муннуктарыгар ситиһиилээхтик билиһиннэрэр. Оҕолор  Украина, Греция, Франция, Испания, Болгария, Китай, Италия, Македония, Турция дойдуларыгар ситиһиилээхтик кыттан, үрдүк биһирэбиллэри ылбыттара. 2009 с. ансаамбыл образцовай оҕо үҥкүү коллективын аатын ылбыта элбэҕи этэр.

Розалия Михайловна ураты толкуйдаах, үрдүк ирдэбиллээх, төрөөбүт дойдута сайдарын туһугар туруулаһар дьиҥнээх патриот, сатабыллаах салайааччы. Кини 2017 с. улуустааҕы “Гармония танца” педагог-хореографтар куонкурустарыгар “Лучший педагог-хореограф — 2017” үрдүк аатын ылбыта. 2017 с. хореограбынан ансаамбыл выпускницата Анастасия Михайловна Алексеева үлэлиир. Ансаамбыл концертмейстера — Екатерина Дмитриевна Березкина.

Хас сыл аайы «Кылыыҥкай» оҕо үҥкүү ансаамбылыгар кытаанах киирсии-куонкурус ааһан саҥа састаап оҕолор ылыллаллар. 2014 сыллаахха  тыҥааһыннаах куонкурсу ааһан кииирбиттэр быйыл дьарыктаммыттара бэһис төгүрүк сыла. Номнуо хореография салаатын бүтэрэр сыллара. Оҕолор нэһилиэккэ, улууска, республикаҕа ыытыллар бары куонкурустарга, тэрээһиннэргэ ситиһиилээхтик кытталлар.

2017 с. – 5-с региональнай “Зима начинается с Якутии” фестиваль-куонкуруска 1 степеннээх лауреат, Дьокуускай к.;  Лука Турнин 100 сылыгар аналлаах илин эҥэрдээҕи улуустар икки ардыларынааҕы фольклорнай фестиваль 1 степэннээх лауреаттара, Ытык Күөл сэл.;

2018 с. – 2-с өрөспүүбүлүкэтээҕи бальнай үҥкүү турнирыгар оҕолор категорияларыгар   1, 2, 3, 4 миэстэ, Чурапчы;

Сахая  Таппырова  — Мариус Петипа 200 сылыгар аналлаах өрөспүүбүлүкэтээҕи айар-научнай конференцияҕа дьүүллүүр сүбэ анал биһирэбил дипломана, Дьокуускай к.;

Сайаана Ефимова — I өрөспүүбүлүкэтээҕи “Дивертисмент” классическай үҥкүү куонкуруһун дипломана, Дьокуускай к., 6-с Регионнаҕы “Первые шаги” оҕо фестивалын 1 степэннээх лауреата, Ытык Күөл; Аан дойдутааҕы “Праздник Терпсихоры” куонкуруска Гран — При, Хатас; өрөспүүбүлүкэ таһымнаах “Северный Арабеск” хореографическай отделениялар куонкурустарыгар 2-с степэннээх лауреат, Дьокуускай к.

Оҕолор бу сайын Турция Кемер куоратыгар 3-с Аан дойдутааҕы “Шоумир Дом солнца Турция” фестиваль-куонкуруһугар Гран-При хаһаайыттарынан, “За сохранение народных традиций” уонна “За лучший национальный костюм” номинациялар кыайыылаахтарынан буоллулар.

Турция Анталия курортнай куоратыгар олус бэркэ дуоһуйа сынньанан, муораҕа сөтүөлээн, кэрэ кэпсээн кэһиилээх, илии тутуурдаах кэлбиттэрэ. Бара-кэлэ Москва куораты таарыйан, Кыһыл болуоссаты көрөн, Россия күнүгэр Саха сирин аатыттан “Этномир” музей-пааркаҕа “Многоликая Россия” фестивальга үҥкүүлээн, үүнэргэ-сайдарга кынаттанан кэлбиттэрэ.

Ааптардар: Саргылана Ефремова, Клавдия Протопопова

This post was published on 21.11.2018 17:22 17:22