Дьаархан нэһилиэгэ «Кыайыы Чороонун» Дьиикимдэтээҕи «Дьулуур» норуот айымньытын киинигэр туттарда. Ньурба улууһун ыччата тыыл бэтэрээннэригэр, сэрии оҕолоругар махтал акциятын ыыттылар.
Дьаархан нэһилиэгин эдэр көлүөнэ ыччата «Кыайыы Чороонун» эстафетатын кэмигэр «Тыыл бэтэрээннэригэр, сэрии оҕолоругар махталы кытары» диэн үтүө санааланыы аахсыйаны тэрийэн ыыппытын туһунан нэһилиэк баһылыга Александров Павел Михайлович иһитиннэрдэ.
Дьиикимдэ нэһилиэгэ аҕам саастаах дьонун ыҥыран, «Кыайыы Чороонун» ох курдук бэлэмнэнэн көрүстэ. «Мичийээнэ» оҕо уһуйаанын үлэһиттэрэ «Ким да умнуллубат, туох да умнуллубат» композицияны туруордулар.
Ньурба оройуон Ытык сүбэтин салайааччыта Михаил Иванович Иванов, улуустааҕы бэтэрээннэр Сэбиэттэрин бэрэссэдээтэлэ Татьяна Прокопьевна Олесова Кыайыы 75 сылынан эҕэрдэлээн туран, ыытыллар тэрээһиннэр, былааннар тустарынан кэпсээтилэр.
Нэһилиэк баһылыга Варвара Анатольевна Сухаринова Дьиикимдэҕэ үс тыыл бэтэрээнэ баарын эттэ. Улуу Кыайыы 75 сылын пуондатыгар С.И.Алексеев аатынан орто оскуола, нэһилиэк дьаһалтата бэйэлэрин сэмэй кылааттарын киллэрбиттэрин, мемориальнай дуоска, стела туруоруутугар, кинигэ тахсыытыгар үлэлэһэллэрин туһунан иһитиннэрдэ.
Дьаархан нэһилиэгин баһылыга Павел Александров «Кыайыы Чороонун» Дьиикимдэ нэһилиэгин баһылыгар Варвара Сухариноваҕа үөрүүлээх быһыыга-майгыга туттарда. Варвара Анатольевна оскуола дириэктэригэр Лаптев Александр Константиновичка чороону туттарда.
Сэрии сылларын оҕолоро Токусарова Марфа Петровна, Семенов Дмитрий Иванович мустубут дьону улам чугаһаан иһэр өрөгөйдөөх Кыайыы бырааһынньыгынан эҕэрдэлээн туран, дьоллоох оҕо саас диэни билбэтэх, үлэлээн ааспыт кэмнэрин ахтан-санаан аастылар.
Ааптар: Антонина Семенова. https://ulus.media/2020/02/12/daarhannar-kyajyy-choroonun-diikimde-ne-ilieger-tuttardylar/
