Тааттаттан, Сунтартан Аллайыахаҕа тиийэ кыһыннары сөтүөлээбит чурапчылар хаартыскалара тилийэ көттө.
Өймөкөөннөр биир дойдулаахтарын Светлана Старкованы булан ыллылар. Оттон 87 саастаах ытык кырдьаҕас Афанасий Дорофеев ойбоҥҥо сөтүөлүү сылдьар хаартыскатыттан дьиэтигэр олороро кытта батсаапка тарҕанна.
«Маладьыастар, чурапчылар!» — диэн чөл олоҕу былаах оҥостор дьону киэн туттан хайҕаабыттар. Кытайдара, французтара да суох, бэйэбит дьоммут — сахалар да кыһыҥҥы ойбоҥҥо умсаахтанан, кыһыммытын айхаллыы сырыттахтара. Дьэ, кырдьык да маладьыастар, чурапчылар!
