Хаандыгаҕа Нерюнгри уонна Алдан куораттарга буолбут кыһыҥҥы спартакиада 3 –с группатын чемпионнарын чиэстээтилэр. Бырааһынньыктыы киэргэтиллибит болуоссакка автобус кэлэн тохтоото, кыайыы кубогын, Томпо улууһун былааҕын күөрэччи туппут, сааскы күөх халлаан курдук өҥнөөх параднай формаларын кэппит сүүмэрдэммит хамаанда чилиэннэрэ түстүлэр, биир ньыгыл кэккэнэн турдулар.
Кыайыылаахтары улуус баһылыгын 1-кы солб. Иван Афанасьев уонна спорт салаатын начальнига Александр Захаров эҕэрдэлээтилэр. Спортсменнарга барыларыгар, тренердэргэ Афанасий Саввиҥҥа, Василий Егоровка, Евгений Голиковка, «Томпо илдьитэ» хаһыат корреспонденыгар Евдокия Неустроеваҕа улуус баһылыга Георгий Герасимов илии баттааһыннаах махтал суруктары, спартакиада түгэннэрин көрдөрөр сабыс – саҥа буруолуу сылдьар хаартыскалаах альбомнары уонна өйдөбүнньүк бэлэхтэри туттардылар.
Үөрэх салаатын салайааччыта Саргылана Андросова Томпо улууһун чиэһин көмүскээбит Мэҥэ Алдан оскуолатын үөрэнээччилэригэр Марианна Колодезниковаҕа, Виктория Борисоваҕа, Иван Готовцевка, Герман Захаровка, Афанасий Борисовка, Иван Чириковка, Николай Никифоровка, Ньургун Степановка, Кириэс Халдьаайы оскуолатын үөрэнээччитигэр Ньургуйаана Винокуроваҕа, Хаандыга оскуолатын үөрэнээччитигэр Давид Голиковка «Кэскил» республиканскай оҕо чэбдигирдэр лааҕырыгар сынньана барар путевкалары ыларга сертификаттары туттарда.
Биһиги хамаандабытыгар үксэ Мэҥэ Алдан спортсменнара, ону таһынан 1-2 –лии киһи Тополинайтан, Хаандыгаттан, Кириэс Халдьаайыттан, Кэскилтэн, Дьабарыкы Хайаттан кытыннылар. Маны таһынан Дьокуускай куоракка үөрэнэр уонна үлэлиир хас да уол хоккейга оонньообуттара. «Хаандыга бөһүөлэгэ» муниципальнай тэриллии баһылыга Михаил Алексеев Афанасий СаввиӨӨа, Евгений уонна Давид Голиковтарга, Михаил Гоголевка, Вячеслав Канаевка уонна Саһыл нэһилиэгин баһылыга Николай Мярин Татьяна Петроваҕа бэлэхтэри биэрдилэр. Евгений Голиковка үлэлиир тэрилтэтин – хайа геологическай техникум директора Михаил Неустроев аатыттан махтал суругу туттардылар.
Биһиги спортсменнарбыт ортолоругар араас идэлээх дьон бааллар: элбэх учуутал, ону таһынан Томпо эбээн нэһилиэгин дьаһалтатын специлиастара, Томпо ИДьО полицейскайа, Хаандыгатааҕы ювелирнай собуот специалиһа, тутааччы уо.д.а. Үөрүүлээҕэ диэн салайааччылар эмиэ бааллар, ол курдук хамаандаҕа хоккейга «Якутуголь» холдинговай хампаанньа персоналы кытта үлэҕэ директора Роман Щегельняк (кини аҕыйах сыллааҕыта Хаандыгаттан Нерюнгрига үлэлии барбыта), Мэҥэ Алдан нэһилиэгин дьаһалтатын баһылыга Юрий Комиссаров, сноубордка Мэҥэ Алданнааҕы искусство оскуолатын директора Роман Чириков кытыннылар.
Махтал суруктары уонна өйдөбүнньүк бэлэхтэри бары спонсордарбытыгар, транспорынан хааччыйбыт оскуолалар директордарыгар Лидия Сохибоваҕа (Хаандыга), Валерий Аммосовка (Арыы Толоон), суоппардарга эмиэ туттардылар.
Хотугу многоборьеҕа Россия спордун маастара, Россия үс төгүллээх чемпиона, Россия кубогын хаһаайына Руслан Ханов спортсменнар ааттарыттан тэрийэн ыыппыт салайааччыларга, көмөлөспүт, биһиги туспутугар ыалдьыбыт спорду таптааччыларга махтанна.
