Кустуур нэһилиэгэ ыраас, тупсаҕай көстүүлээх буоларын ситиһэргэ тиһиктээх үлэ ыытыллар. Ол курдук, түөлбэлэр күүстэринэн сүрдээх киэҥ ырааһырдыыны ыыттылар. Сквер кырааскалааһына, эргэ оскуола таһын хомуйуу, көҕөрдүү о.д.а. бу маны барытын түөлбэлэр субуотунньук тэрийэн ыыттылар.
«Кустуурга киэн туттар дьоммутугар анаан «Почетная лента граждан» арыйдыбыт» , — диэн нэһилиэк баһылыгын солбуйааччыта Надежда Старостина иһитиннэрэр.
Үөрүүлээх быһыыга-майгыга Кустуур бочуоттаах дьонун үйэтитэр сыаллаах сквергэ үтүө дьоннорун хаартыскаларын саҥардан, олохтоох дьаһалта оҥотторон ыйаабыттара олус үчүгэй көстүү буолла.
Бэлиэ түгэн кэрэхсэнэр күнүгэр олохтоох дьаһалта кэллэктиибэ мустубут дьону итии чэйдээх, сылаас алаадьылаах күндүлээн көрүстүлэр. Ону тэҥэ түөлэбэнэн атыы — эргиэн дьаарбаҥката үгүс киһи болҕомтотун тарта. Манна сибиэһэй балык, үрүҥ ас эгэлгэтэ, күһүҥҥү быйаҥ араас көрүҥэ тэлгэннэ. Дьаарбаҥка түмүгүнэн 1 миэстэ — «Чолбон», 2 — «Сарыал», 3 — «Кэскил» түөлбэлэр ыллылар.
Алын кылаас оҕолоругар «Саха сирин устуоруйата» викторинаны үөрэҕирии туйгуна М.В. Каратаева сэргэхтик ыытта. Эҕэрдэ тылы баһылык солбуйааччыта Надежда Старостина, бочуоттаах киһибит Светлана Черепанова эттилэр. Нэһилиэк чаҕылхай сулустара уонна Саккырыыртан кэлэн үлэлээн эрэр, нарын куоластаах Нарыйаана Колесова, С.Т.Винокурова салайыытынан оскуола оҕолорун толорууларыгар «Алгыстаах үҥкүү», Ангелена Слепцова хомуска дьүрүйүүтэ киэргэттилэр. Былыр былыргыттан учуутал идэлээхтэрбит үлэбит түбүктээх диэн биир да тэрээһинтэн, нэһилиэк олоҕуттан туора турбакка кытталлара оҕолорго дьоһун холобур буолар.
«Алыптаах тыллар» хоһоон күрэҕэ буолла. Улахан дьоҥҥо 1 миэстэни Федора Гатилова, 2 — Тамара Шадрина, 3 — Никита Григорьев буоллулар. Оҕолорго 1 миэстэ — Егор Слепцов, иккис 4 кылаас кэллэктиибэ, үһүскэ 2 кылаастар таҕыстылар. Улахан оҕолорго бастакы миэстэни 5 кылаас үөрэнээччитэ Дуня Колесова ситистэ.
Уһуйаан, оскуола оҕолоро төрөппүттэрин кытта айылҕа матырыйаалыттан оҥоһуктарын быыстапката улахан сэҥээриини ылла, дьон сөҕө махтайа көрдө. Манна бэлэмнэнии бөлөххө 1 миэстэ — Эрхан, Эрэл Старостиннар, 2 миэстэ — Алисиния Старостина, 3 миэстэ — Христина Сотрудникова буоллулар. Улахан бөлөхтөргө 1 миэстэ — Ализана Старостина, 2 — Харысхан Егоров, 3 — Арсен Осипов буоллулар. Оскуола оҕолоругар 1 миэстэ — Тимирлан Егоров, 2 — Эрчим Старостин, 3 миэстэ — Ранит Горохов ыллылар.
Ааптар: Мария Саргина, Эбээн-Бытантай улууһа
