Саха Өрөспүүбүлүкэтин Ил Түмэнин Бэрэссэдээтэлэ Александр Жирков салалтатынан муус устар 5 күнүгэр Мирнэй куоракка буолбут парламент уонна бырабыыталыстыба холбоһуктаах мунньаҕар өрөспүүбүлүкэҕэ кураанах турар дьиэ фондатын туһаҕа таһаарыы боппуруоһун көрдүлэр.
Бу мунньаҕы ыытыыны Ил Түмэн бюджекка, үпкэ, нолуок уонна сыана политикатыгар, бас билии боппуруостарыгар сис кэмитиэтин бэрэссэдээтэлэ Юрий Николаев көҕүлээтэ. Кэпсэтиигэ Ил Түмэн сис кэмитиэттэрин бэрэссэдээтэллэрэ, норуот депутаттара, бырабыыталыстыба чилиэннэрэ, министиэристибэлэр, биэдэмистибэлэр салайааччылара, улуус баһылыктара, улуус депутаттарын сэбиэттэрин бэрэссэдээтэллэрэ, промышленнай компаниялар бэрэстэбиитэллэрэ кытыннылар.
Сүрүн дакылааты СӨ Дьиэ-уот коммунальнай хаһаайыстыбатын миниистирин солбуйааччы Наталья Чукавина оҥордо. Кини көрүллэр боппуруос бюджет үбүн тус сыаллаах туһаныллыытын кытта быһаччы сибээстээҕин эттэ.
Хаарбах уонна саахаланар туруктаах олорор дьиэ ахсаанынан Саха сирэ дойдуга бастакы миэстэлээх. Маннык усулуобуйаҕа, сүрүннээн мас дьиэлэргэ 125 тыһ. киһи олорор. Итини таһынан 28 тыһ. ыал дьиэни тупсарыы уочаратыгар турар. Кинилэр ортолоругар инбэлииттэр, эдэр уонна элбэх оҕолоох ыаллар аҕыйаҕа суохтар.
Миниистири солбуйааччы этэринэн, үөскээбит кыһалҕаны туоратыыга биир быһаарыллыан сөптөөх суолунан хаарбах дьиэлэртэн дьону муниципальнай бас билиигэ баар, ол эрээри толору туһаныллыбакка турар дьиэлэргэ көһөртүөххэ сөп. Билиҥҥи туругунан өрөспүүбүлүкэҕэ 1072 квартираҕа ким да олорбот, кураанах. Итилэртэн 185 квартира саахаланар туруктаах дьиэлэргэ баар. Оттон 887 квартираҕа капитальнай өрөмүөн ыытан саҥардан биэрдэххэ, дьону көһөрүөххэ сөп.
Ити этиллэр 887 квартираттан 753-һэ муниципальнай бас билиигэ баар. Манна даҕатан эттэххэ, олохтоох салайыныы уорганнара бу квартиралары көрүүгэ-истиигэ үбү балайда ороскуоттууллар. Холобур, квартиралары ититиигэ сылга 16 мөл.солк. көрүллэр. Маны таһынан туһааннах олорор дьиэ фондатын көрүүгэ судаарыстыба бюджетыттан коммунальнай өҥөнү оҥорор тэрилтэлэргэ 102 мөл.солк. дотация бэриллэр. Сылга холбоон 118 мөл. солк. үп ороскуоттанар. Итинник кураанах квартиралар ордук Дьокуускайга, Булуҥҥа, Мирнэйгэ, Үөһээ Халымаҕа бааллара бэлиэтэнэр. Онон бу улуустарга ким да олорбот квартиралардаах дьиэлэргэ коммунальнай өҥөнү
оҥорууну толуйууга балачча үп ороскуоттанар. Оттон туһааннаах министиэристибэ аахпытынан, ситэ туһаныллыбат дьиэлэргэ капитальнай өрөмүөнү ыытыыга 300 мөл.солк. ирдэнэр. Бу сууманы Наталья Чукавина саахаланар дьиэлэртэн көһүү программатыгар көрүллэр үптэн ыытарга этии киллэрэр. Ол эбэтэр программаҕа хаарбах дьиэлэри көтүрүү, саҥа дьиэлэри тутуу ыстатыйаларын таһынан кураанах олорор дьиэ фондатын капитальнай өрөмүөнүгэр тус сыаллаах үбүлээһини көрөрү этэр.
Бастыҥ холобур быһыытынан миниистири солбуйааччы Мирнэй оройуонун аҕалла. Чернышевскай уонна Чуона нэһилиэгин Заря бөһүөлэктэрин кураанах дьиэлэрин муниципальнай программанан туһаҕа таһаараннар, билигин олохтоох бюджет сыллата 38 мөл. солк. кэмчилиир буолла.
Бу туһунан иһитиннэриини Мирнэй оройуонун экономикаҕа уонна үпкэ баһылыгын солбуйааччы Георгий Башарин оҥордо. Кини этэринэн, бу хайысхаҕа оройуоҥҥа үлэ салҕанар уонна 2017-2021 сс. саҥа программа оҥоһуллан олоххо киирэр.
Парламентарийдар мирнэйдэр үлэлэрин уопутун биһирээтилэр уонна бу бастыҥ холобуру өрөспүүбүлүкэҕэ тарҕатарга этии киллэрдилэр. Мунньах түмүгүнэн Ил Түмэн бырабыыталыстыбаҕа «2018-2022 сс. сылларга олорор дьиэнэн хааччыйыы уонна олох-дьаһах коммунальнай өҥөлөрүн хаачыстыбатын үрдэтии» СӨ судаарыстыбаннай программатыгар, чуолаан муниципальнай бас билиигэ баар кураанах турар квартиралар капитальнай өрөмүөннэригэр судаарыстыба өттүттэн өйүүр механизмнары тобулан, программаҕа уларытыыны киллэрэргэ сорудах биэрдэ.
Ил Түмэн пресс-сулууспата.
