Өрөспүүбүлүкэтээҕи лиссиэйгэ Дьокуускай куорат дьаһалтатын баһылыга Айсен Николаев ыалдьыттаата. Бу туһунан СИА-ҕа лиссиэй саха тылыгар уонна литературатыгар учуутала Саргылаана Игнатьева кэпсээтэ.
«Кэпсэтии кэмигэр оҕолор Айсен Сергеевичтан кыра оҕо сылдьан тугу сөбүлүүрүн, оскуолаҕа үөрэммит, устудьуоннаабыт кэмнэрин ыйыталастылар. Куорат баһылыга ахсаан, история уруоктарын сөбүлүүрүн, кэрэхсиир суруйааччытынан Былатыан Ойуунускай буоларын, «Улуу Кудаҥса» айымньыны сотору-сотору ааҕарын, хас биирдии тылыгар, ис хоһоонугар улахан болҕомтотун уурарын эттэ. Маны сэргэ үөрэппит учууталларыгар махтанна. Үөһээ Бүлүүтээҕи физико-математическай оскуолаҕа үөрэнэригэр физикаҕа Виктор Филиппович Потапов киэҥ билиини биэрбитин долгуйан аҕынна. Санаатын сааһылаан этэргэ, сатаан мөккүһэргэ үөрэппит-такайбыт учууталын Надежда Ильинична Гаврильеваны ураты истиҥник ааттаата, кинилэр такайыылара олоҕор, үлэтигэр күн бүгүҥҥэ диэри улаханнык туһалыылларын бэлиэтээтэ. Кэнчээри ыччакка элбэҕи ааҕалларыгар сүбэлээтэ», — диэтэ Саргылаана Ивановна.
Айсен Николаев үөрэнээччилэргэ, учууталларга мэринэн талыллыаҕыттан туох үлэни ыыппытын, үлэтин-хамнаһын былаанын сырдатта, истиҥник кэпсэттэ.
