«Хаартыскаҕа түс – айфонна сүүй!» диэн ааттаах куонкуруһу Саха сирин волонтердарын кытта үлэлиир киин олохтоохтор быраап уонна бэлиитикэ култууратын эйгэтигэр таһымнарын үрдэтэллэригэр туһаайан ыытар. Бу куонкуруска 18 сааһын туолбут РФ олохтоохторо кытталлар.
Кулун тутар 18 күнүгэр хас быыбардыыр учаастак ахсын хаартыскаҕа түһэр зона уонна ыйан-кэрдэн биэрэр координатордар баар буолуохтара. Куонкуруска кыттааччы бу зонаҕа хаартыскаҕа түһэн баран, #ЯкутияВыбирает диэн хэштегтээн “ВКонтакте” эбэтэр “Инстаграм” социальнай ситимҥэ угар. Маныаха, кыттааччы социальнай ситимнэрин аккауннара (сирэйдэрэ) аһаҕас буолуохтаахтар.
Кыайыылаахтары куоластааһын уонна дьүүллүүр сүбэ быһаарыахтара. 10 бастакы миэстэҕэ – уон Apple Iphone X смартфон, 10 иккис миэстэҕэ – уон Apple iPad планшет, 10 үһүс миэстэҕэ – уон Apple iPad mini планшет бириистэр күүтэллэр. Куонкурус балаһыанньатыгар эппиэттэспэт, хаачыстыбата мөлтөх уонна араасанан, религиянан арахсыы, атааннаһыы хабааннаах хаартыскалар куоластааһыҥҥа киирбэттэр.
Айыллаан Винокуров, Саха сирин волонтердарын кытта үлэлиир киин салайааччыта:
— Куонкурус сүрүн сыала — ыччат быыбарга кыттыыта. Манна туох даҕаны лотерея оонньоммот, кими даҕаны агитациялаабаппыт. Баҕалаах киһи барыта кыттар, сүрүнэ – социальнай ситимнээх эрэ буолуоххутун наада. Хэштегынан түспүт хаартыскаҕытын бэлиэтээтэххитинэ тута саайтка киирэр, онно куоластааһын барыаҕа. Барыгытын көхтөөхтүк кыттаргытыгар ыҥырабын.
