Саха Өрөспүүбүлүкэтин култуураҕа уонна духуобунай сайдыыга миниистирэ Юрий Степанович Куприянов Саха сирин олохтоохторун Ырыа күнүнэн эҕэрдэлиир. «Ырыа – истиҥ иэйии. Сахаларга  урукку үйэлэртэн олохторун-дьаһахтарын хоһуйар, үөрүүлэрин үксэтэр, хомолтолорун уҕарытар ырыа буолар», — диир салайааччы.


Саха Өрөспүүбүлүкэтин култуураҕа уонна духуобунай сайдыыга министиэристибэтин уонна тус бэйэм ааппыттан Саха сиригэр ырыа күнүнэн итиитик-истиҥник эҕэрдэлиибин!

Ырыа күнэ 2013 сылтан тиhигин быспакка ыытыллар. Саха өйдөбүлүнэн, саҥа сыл самаан сайын үүнэр күнүттэн саҕаланар. Ол аата дьылы этэҥҥэ туораан, күөххэ үктэнэн баран саҥа сылы үөрэн-көтөн туран бэлиэтииллэрэ буолар.  Саҥа сылга туох барыта саҥалыы саҕаланар – айылҕа уһуктар кэмигэр ырыа күнэ анаммыта  олус тоҕоостоох дии саныыбын.

Биһиги өбүгэлэрбит бэйэлэрин Ийэ айылҕа оҕолорунан ааҕыналлара. Тулалыыр эйгэлэрин кытта эттиин-хаанныын, өйдүүн-санаалыын биир ситимнээхтик олорорго кыһаналлара. Сахаларга  урукку үйэлэртэн олохторун-дьаһахтарын хоһуйар, үөрүүлэрин үксэтэр, хомолтолорун уҕарытар ырыа буолар.

Ырыа  бүтүн норуот олоҕун-дьаһаҕын бүтүннүү өрө таһаарар, тупсарар уонна сырдыкка-кэрэҕэ тардыһыыны күнтэн күн күүһүрдэр, кынаттыыр ураты эйгэ.

Саха ырыата киэҥ суолун тэлбит, ыллыгын уурбут, бэйэлэрин улахан кылааттарын киллэрбит дьоммутунан киэн туттабыт, махтанабыт – Адам Скрябинҥа, Федор Корниловка, Марк Жирковка, Грант Григорянҥа, Екатерина Захароваҕа,  Захар Степановка, , Христофор Максимовка, Валерий Ноевка, Ольга Иванова-Сидоркевичка,  Виталий Андросовка,  Аркадий Алексеевка,  Марфа Даниловаҕа, Василий Зыряновка, Анастасия Варламоваҕа, Галина Шахурдинаҕа, Валерий Татариновка, Юрий Платоновка, Владимир Заболоцкайга, Степан Васильевка, Алексей Егоровка, Алексей Калининскайга уо.д.а.

Ырыа эйгэтин сайдыыта, биллэн турар, кини хас биирдии көрөөччү кутун-сүрүн долгутар, уһугуннарар айымньыларыттан, ырыаһыт бэриниилээх үлэтиттэн тутулуктааҕа саарбаҕа суох. Ону биһиги көмүс куоластаах ырыаһыттарбыт, ырыа айааччыларбыт араас таһымнаах аан дойдуга, Арассыыйаҕа, Саха сиригэр ыытыллар ырыа күрэхтэригэр ситиһиилээхтик  кытталлара туоһулуур, бигэргэтэр.

Бу кэрэ-бэлиэ күҥҥэ баҕарыам этэ хас биирдиигитигэр – лабааҕыт лаглайдын, силискит чиҥээтин, остуоруйа дойдуланын, олоҥхо олохтонуҥ! Төрөөбүт норуоккут сайдарын туһугар кэскиллээх кылааккыт чэчирии сайыннын!

Бука бары Сахам сирин олохтоохторун Ырыа күнүнэн эҕэрдэлиибин! Ырыа аргыстаах күн аайы олоруоҕуҥ!

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.