Култуура уонна духуобунай сайдыы министиэристибэтигэр бэс ыйын 21 күнүнээҕи национальнай бырааһынньыкка — Ыһыахха — ыытыллар тэрээһиннэр тустарынан кэпсээтилэр. СИА суруйар.
Култуура миниистирин солбуйааччы Владислав Левочкин бэлиэтээбитинэн, Ыһыахха анаан элбэх онлайн-тэрээһини култуура тэрилтэлэрэ бэлэмнииллэр. 556 муниципальнай уонна өрөспүүбүлүкэтээҕи таһымнаах дьаһаллар ыытыллыахтара. Үксэ бэс ыйын 21 күнүгэр буолуоҕа. «Онлайн киэбинэн ыытыллаллар — куонкурустар, маастар-кылаастар, лекциялар, челленджтар, испэктээктэр, кэнсиэртэр. Маны сэргэ үгэскэ кубулуйбут күнү көрсүү уонна алгыс», — диэтэ кини.
Күнү көрсүү сиэрэ-туома бэс ыйын 20-тэн 21-с буолар түүнүгэр 2 чаас 30 мүнүүтэҕэ ыытыллыаҕа. НВК «Саха» ханаалынан көстүөҕэ, Олоҥхо театрын инстаграм-сирэйигэр тахсыаҕа.
Национальнай библиотека бу күн араас маастар-кылаастары уонна лекциялары тэрийиэҕэ. Саха быһаҕын оҥоруу улахан интэриэһи тардар, бу сырыыга РФ норуотун маастара, Саха сирин уустарын холбоһуктарын бэрэссэдээтэлин солбуйааччы Роман Готовцев – Мындыр Уус көрдөрүөҕэ. НВК «Саха» уонна национальнай библиотека инстаграм-сирэйигэр көстүөҕэ. Библиотека саайтыгар Ыһыах туһунан кэпсиир кинигэлэр туруорулуннулар.
Өксөкүлээх Өлөксөй аатынан норуоттар доҕордоһууларын дьиэтин генеральнай директора Яна Игнатьева иһитиннэрбитинэн, өрөспүүбүлүкэ норуоттарын национальнай көстүүмнэрин көрүү салҕанан барар, куонкуруска 300-тэн тахса сайаапка киирдэ.
«Симэх» национальнай киин кылтан, сиэлтэн, туостан оҥоһуктарга куонкурус биллэрбитэ уонна чорооннор быыстапкаларын туруорар.
Өрөспүүбүлүкэтээҕи тэрээһиннэр тустарынан манна билсиэххэ сөп.
