Сүүмэрдэммит хамаанда сайаапкатыгар Саха сириттэн икки боксер киллэрилиннэ. Ол курдук, аан дойду чөмпүйэнээтин финалиһа Василий Егоров 49 кг диэри ыйааһыҥҥа киирсиэҕэ. Оттон Горнай улууһуттан төрүттээх, билигин Новосибирскай уобалас чиэһин көмүскүүр дойду былырыыҥҥы призера Артур Ложников 52 киилэлээхтэргэ күрэстэһиэҕэ. Билигин спортсменнар Кисловодскайга эрчиллэр сборга сылдьаллар.

Хамаанда ыстаабыгар эппиттэринэн, күрэс бастакы күнүгэр, балаҕан ыйын 13-гэр, рингэҕэ Василий Егоров (49 кг), Карен Арутюнян (52), Шахриер Ахмедов (56), Альберт Батыргазиев (60), Павел Федоров (64), Андрей Замковой (69), Глеб Бакши (75), Георгий Кушиташвили (81), Магомедмурад Арсланбеков (91) итиэннэ Максим Бабанин (91 кг үөһэ) тахсыахтара. Иккис күн Батор Сагалуев (49), Артур Ложников(52), Бахтовар Назиров (56), Артур Субханкулов (60), 64 кг диэри ыйааһыҥҥа Никита Пискунов биитэр Иван Козловскай, 69 кг — Сергей Собылинскай биитэр Харитон Агрба, 75 кг — Максим Коптяков биитэр Эдгард Цамбов, 81 кг — Павел Силягин, 91 кг — Иван Сагайдак күрэстэһиэхтэрэ. Арай ыарахан ыйааһыҥҥа (91 кг үөһэ) билиҥҥитэ ким киирсиэҕэ биллибэт.

Эдуард Кравцов Куба хамаандата күөн көрсүһүүгэ сүрүн састаабынан кыттарын, кинилэргэ аан дойду хас да чөмпүйүөнэ баарын эттэ.

Санатар буоллахха, матчевай көрсүһүүлэр балаҕан ыйын 13 уонна 14 күннэригэр Волгоград куоракка буолуохтара.

Роман Попов, edersaas.ru