«Космоска айан» диэн өрөспүүбүлүкэтээҕи оҕолор олимпиадаларын кыайыылаахтара «Восточнай» космодромҥа «Союз» ракета көтүүтүн көрө барыахтара. Маны таһынан, кыайыылаахтар сайын Амма улууһун «Үүнээйис» профильнай лааҕырыгар дьарыктаныахтара, ахсынньыга — Москуба Сулустаах куоратыгар космонавтары бэлэмниир кииҥҥэ.
«Космоска айан» диэн оҕолорго сылын аайы ыытыллар өрөспүүбүлүкэтээҕи олимпиада быйыл муус устар 1-2 күннэригэр ыытыллыбыт. Бастакы түһүмэххэ оҕолор математикаҕа, физикаҕа олимпиаданы ааспыттар, иккис түһүмэххэ – английскай тылга, космонавтика историятыгар тесты.
Олимпиадаҕа 10 улуустан 294 8-10 кылаас үөрэнээччилэрэ кыттыыны ылбыттар. Бастыҥ түмүктэри Нерюнгри 24№-дээх информационнай-технологическай лицейын, Амма лицейын, Мүрүтээҕи уолаттар гимназияларын үөрэнээччилэрэ көрдөрбүттэр.
Муус устар 24-27 күннэригэр Амматтан, Үөһээ Бүлүүттэн, Бүлүүттэн, Горнайтан, Мэҥэ-Хаҥаластан, Хаҥаластан, Уус-Алдантан, Нерюнгриттан барыта 20 кыайыылаах Амур уобалаһыгар Циолковскай куоратыгар «Восточнай» космодромҥа «Союз» ракета көтүүтүн көрө барыахтара. Итини таһынан, оҕолор Циолковскай куоракка, космодромҥа экскурсияҕа сылдьыахтара, «Восточнай» космодром тутуллуутун туһунан лиэксийэ истиэхтэрэ.
Сайын олимпиада кыайыылаахтара Амма улууһун «Үүнээйис» профильнай лааҕырыгар дьарыктаныахтара, ахсынньыга — Москуба Сулустаах куоратыгар космонавтары бэлэмниир кииҥҥэ.
