Тыа хаһаайыстыбатыгар Судаарыстыбаннай бириэмийэ лауреата Михаил Михайлов салайар «Комплекс» бааһынай хаһаайыстыбата Чурапчы улууһугар инники күөҥҥэ сылдьар.


Сыллата 130 тонна үүтү туттарар хаһаайыстыба кураан сирдээҕин-уоттааҕын учуоттаан, сүөһү аһылыгын бааһынаттан хааччынарга дьулуһан үлэлиир. Онон, cыллата бааһынатын кэҥэтэн иһэр. Ол курдук, былырыын 345 гектарга бурдугу уонна оту ыспыта, быйыл 360 гектар бааһынаҕа үлэлиир, ону таһынан, эһиилги ыһыыга анаан 150 гектар саҥа сири таҥастыыр былааннаах.

«Сааскы хас биирдии күн былдьаһык. Биллэрин курдук, тыа киһитэ бэйэтэ сүүрэн-көтөн хайа эрэ баантан кирэдьиит ылан, ыһыы сиэмэтинэн уонна уоҕурдуунан хааччынара уустук. Биһиэхэ бу кыһалҕаны быһаарарга «Сахакирэдьиит» өрөспүүбүлүкэтээҕи уонна «Тускул» диэн улуустааҕы кэпэрэтииптэр тирэх буолаллар. Кинилэр көмөлөрүнэн кирэдьииккэ тииһинэн, наада буолар сиэмэбитин, уоҕурдуубутун үлэспиппит кэмигэр кэлэр. Быйылгы ыһыыга 60 тонна сиэмэ бурдугу уонна 40 тонна уоҕурдууну ыллыбыт, иэспитин уһаппакка төлөөтүбүт. Инньэ гынан, ыһыыга үчүгэй настарыанньалаах киирдибит», — диир Михаил Михайлов. 

Хатыҥ чараҥынан тулаламмыт Одьулуун бааһыналарыгар тыраахтардар сарсыарда эрдэттэн үлэлииллэр. Сир уустарыгар өлгөм үүнүүнү баҕарыаҕыҥ.

edersaas.ru 

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.