Хаандыга бөһүөлэгин киинигэр ОДьКХ үлэһиттэрэ улуус дьаһалтатын үлэһиттэрин кытта көрсөн баран кэннинэн чугуйар аат суох, күөнтэһии кытаанаҕа.
Дьаһалта үлэһиттэрэ, ол иһигэр улуус баһылыга Георгий Герасимов, бөһүөлэк баһылыга Михаил Алексеев, араастаан киирэ сатаатылар да туһа суох. Эр дьон төттөрү-таары сүүрэллэр. «Тэп даа тэп», «Саай», «Кытаат, куттаныма» дэһэр саҥалар иһиллэллэр, сороҕор хаһыытаан да ылаллар, күөх хонууга төкүнүһэллэр, сирэйдэринэн сири сухалыыллар. Дьаһалта биир эдэр үлэһитэ атаҕын быһа тэптэрбитин икки өртүттэн өйөөн илдьэ бараллар. Оччону истэн, көрөн биһиги тэптэрэн биэрэбит.
Эмиэ да сөп ээ, директордара Мухитдин Якупов, Дьокуускай куораттан командировкаҕа кэлбит ОДьКХ ГУП генеральнай директорын солб. Юрий Садовников уонна «Сахаспецтранс» ХЭТ генеральнай директора Вячеслав Мусихин бэйэлэринэн киирсэ сырыттахтарына коммунальщиктар хайдах кэннилэринэн кэхтиэхтэрэй…
Ити курдук коммунальщиктар уонна улуус дьаһалтатын хамаандалара футбол оонньоотулар. Дьаһалта хамаандатын боруотатыгар бастакы мээчиги Олег Рубанов, иккиһи — Юрий Шульга киллэрдилэр. Икки сырыы тухары Юрий Садовников тэбэн биэрбит мээчигин киллэрдилэр. Улуус дьаһалтатыттан ОДьКХ салаатыгар специалиһа Степан Яковлев оонньуу бүтүүтэ биир мээчиги киллэрдэ. Онон 2:1 коммунальщиктар кыайдылар. Улуус дьаһалтатын хамаандатыгар Европа чемпионатын кик-боксиҥҥа боруонса призера, улуус баһылыгын соц. хайысхаҕа солбуйааччы Петр Новгородов, Саха сирин мас тардыһыыга хас да төгүллээх чемпиона, спорт салаатын салайааччыта Александр Захаров, Манчаары оонньууларын хапсаҕайга бэтэрээннэргэ үрүҥ көмүс призера Владимир Илларионов уо.д.а. оонньоотулар.
